Эдьигээҥҥэ дрону ыытыыга күрэхтэстилэр

Кулун тутар 19 күнүгэр Эдьигээҥҥэ “Айс квант” технопаарка оскуола оҕолорун икки ардыгар дрону салайыыга күрэхтэһии ыытта. Күрэхтэһиигэ анаан ДЮСШ успуорт саалатыгар элбэх туора салайыылаах трасса оҥорбуттар.

Түмүк ким төһө түргэнник дрону биэтэккэ тиэрдибитинэн быһаарыллар. Күрэхтэһиигэ сэттэ оҕо кыттыыны ылла. Бастакы миэстэни Ермолаев Кирилл ылбыт – кини дрона 1 мүнүүтэ 1 сөкүүндэ иһигэр трассаны ааспыт. Иккис миэстэни лиидэртэн 4 эрэ сөкүүндэнэн хойутаан, Семенов Дамир ылбыт. Оттон үһүс миэстэҕэ эрэллээхтик Захарова Карина тахсыбыт, кини көрдөрүүтэ — 1 мүнүүтэ 12 сөкүүндэ.

Кыайыылаахтар грамотанан уонна минньигэс бириистэринэн наҕараадаламмыттар.