Эдьигээҥҥэ «Дюмия» этнокултуурунай киин аһылынна

Эдьигээҥҥэ 1,6 тыһыынчаттан тахса квадратнай миэтэрэ иэннээх «Дюмия» этнокултуурунай сайдыы уонна норуот айымньытын саҥа киинэ аһылынна.

Эбийиэк үөрүүлээх аһыллыытыгар Ил Дархан Айсен Николаев кытынна. «2019 сылллаахха оройуоҥҥа оробуочай сырыы түмүгүнэн култуура киинин бырайыактааһыҥҥа уонна тутууга сорудах биэрбитим. Уопсайа 1,6 тыһыынчаттан тахса кв. м иэннээх саҥа дьиэҕэ маассабай тэрээһиннэри ыытыахтара, нэһилиэнньэ култуурунайдык сынньанарын уонна кинилэр талааннарын арыйарга бары усулуобуйа тэрилиннэ.

Бу күннэргэ  бырайыак чэрчитинэн «Экстра Синема» киинэ саалата арыллыбыта уонна бүгүҥҥү күнтэн ыла киинэ көрдөрөн барыахтара. Билигин саҥа кэрэ дьиэҕэ үлэ күөстүү оргуйарын олохтоохтор бары астыналлар», — диэн ТГ-ханаалыгар Айсен Николаев суруйда.

Кииҥҥэ 232 миэстэлээх саала, буфет, видеосаала, компьютернай саала бааллар, ону кытта звукозапись устуудьуйата, бильярд, теннис оонньуур хосторо, куруһуоктар ыытыллар сирэ,  итини сэргэ сиэр-туом ыытар төгүрүк быһыылаах саала.