Эдьигээҥҥэ эр киһи муус анныгар түһэн өлбүт

Эдьигээн улууһугар 51 саастаах эр киһи муус анныгар түһэн өлбүт. Кини өлүгүн алтынньы 16 күнүгэр, чэппиэргэ, буллулар.

Сэрэдэҕэ, алтынньы 15 күнүгэр, Саха сиринээҕи Быыһыыр сулууспатыгар алтынньы 11 күнүгэр Баахынай сэлиэнньэтин олохтооҕо дьиэтиттэн тахсан, Баахынай үрэҕин диэки барбытын туһунан иһитиннэрии киирбит. Бу сир сэлиэнньэттэн 10-ча км тэйиччи сиргэ баар.

«Кэлин кини балааккатыгар тиийбэтэҕэ биллибит, ханна баара биллибэт этэ. Бу киһи соҕотоҕун олорор, быһылаан туһунан аймаҕа иһитиннэрбит», — диэн биэдэмистибэ иһитиннэриитигэр этиллэр.

Сүппүт киһини олохтоохтор көрдөөбүттэр. Бүгүн сарсаырда 11.00 чааска кини өлүгүн уу анныттан  буллулар. Эр киһи муус анныгар түһэн өлбүт.