Эдьигээҥҥэ «Кыайыы 65 сыла» хочуолунай тэрилин саҥардыахтара

Урут технологическай кэһиллиилэр тахсыбыт Эдьигээннээҕи «Кыайыы 65 сыла» хочуолунайыгар тэриллэри уларытыы салҕанар. Бу туһунан бөһүөлэк олохтоохторугар бырабыыталыстыба отчуотун кэмигэр бастакы вице-премьер Дмитрий Садовников иһитиннэрдэ.

Кини эппитинэн, «Кыайыы 65 сыла» хочуолунайы кыра-кыралаан саҥардыы чэрчитинэн, быйыл биир ититэр хочуолу, оттон эһиил өссө үһү уларытыахтара.

Атын ититэр эбийиэктэри ылар буоллахха, «Таежная» хочуолунайы оройуон дьаһалтата чааһынай хампаанньалары кытта бииргэ саҥаттан тутар барылын дьүүллэһэр. Маны таһынан, уһуннук умайар хочуоллары туруоруу боппуруоһа көрүллэр, манна сайаапкалары хомуйаллар.

Оттон аэропорт хочуолунайыгар ититэр тэрили уларытыы быйыл былааннаммыт. Дьиэ иһинээҕи ситимнэри туһаныы ирдэбиллэрин тутуһар наадата бэлиэтэннэ.

Олохтоохтору кытта көрсүһүүгэ тупсарыы боппуруостара эмиэ таарылыннылар. Эдьигээҥҥэ Михаил Ефимович Николаев аатынан паарка Уһук Илин федеральнай уокурук субъекттарын IV куонкуруһугар кыайыылааҕынан таҕыста. Бырайыак олоххо киирэригэр федеральнай таһымҥа биэрэги бөҕөргөтөр үлэлэр наадалар.

«Биһиэхэ бу судургу бырайыак буолбатах,  Эдьигээн иккис дойдута буолбут Бастакы Бэрэсидьиэммитин кэриэстээһин буолар. Набережнай бөҕө турарын туһугар биэрэги бөҕөргөтүөххэ наада. Бу федеральнай үлэлэр – мээнэ саҕалаабаккын, уочаракка туруохха наада. Боппуруос уустук, ол эрээри дьарыктаныахпыт. Кэриэстэбил тыыннаах буолуохтаах», — диэн эттэ Дмитрий Садовников.

Олохтоохтор социальнай эбийиэктэр тиийбэттэрин, элбэх оҕолоох ыаллары дьиэнэн хааччыйыы, субсидиялаах авиабилиэттэр, хотугу таһаҕаһы тиэрдии эрэллээх буолуутун, ону тэҥэ стадиону саҥардыы туһунан боппуруостары көтөхтүлэр. Сайаапкалар барыта учуоттаннылар уонна тус министиэристибэлэргэ үлэҕэ бэрилиннилэр.

Эдьигээнтэн ураты, үлэлиир бөлөх икки күн иһигэр кыһыҥҥы суолунан 400-тэн тахса километр сири айаннаан, Бааханай уонна Бэстээх сэлиэнньэлэригэр сырытта. Бааханай сэлиэнньэтигэр сүрүн тиэмэнэн оскуола буолла. Үөрэх тэрилтэтэ 40-тан тахса сыл үөрэххэ анамматах мас дьиэҕэ үлэлии олорор. Эбийиэк туруга хааччахтаах үлэлиир кыахтаах диэн сыаналанар. Бу боппуруоска эһиилги балаҕан ыйыгар диэри ирдэбиллэргэ сөп түбэһэр усулуобуйаны тэрийэргэ соруйар суут быһаарыыта баар. Нэһилиэккэ атын сөптөөх дьиэ суох, онон биир кэлимник быһаарыы  ирдэнэр.

Айан бырагырааматын чэрчитинэн мунньахтар, социальнай эйгэ уонна ОДьКХ эбийиэктэрин көрүү, ону тэҥэ гражданнары тус бэйэни көрүү былааннаммыт. Олохтоохтор биэдэмистибэлэр бэрэстэбиитэллэригэр быһаччы ыйытык биэрэр кыахтаналлар. Маныаха СӨ Ил Дархана Айсен Николаев отчуоттары маннык илэ көрсөн ыытыы ордук ыраах уонна суола-ииһэ мөлтөх нэһилиэктэргэ наадалааҕын бэлиэтээбитэ.

«Өрөспүүбүлүкэ элбэх олохтооҕо былаас бэрэстэбиитэллэрин кытта «тыыннаах» кэпсэтиини ордорор, бу нэһилиэктэр сайдыыларын уонна олохтоох соруктары быһаарыы боппуруостарын дьүүллэһэргэ кыах биэрэр», — диэн кини эппитэ.

РФ Бэрэсидьиэнэ Владимир Путин судаарыстыбаннай былаас уорганнара аһаҕас буолуулара уонна гражданнары кытта мэлдьи сибээстэһии салайыы көдьүүһүн үрдэтэригэр урут болҕомтотун уурбута.