Эдьигээҥҥэ Роман Дмитриев кэриэһигэр мас тардыһыыга күрэхтэстилэр

Эдьигээҥҥэ олимпийскай чөмпүйүөн Роман Дмитриев кэриэһигэр үөрэнээччилэр ортолоругар мас тардыһыыга күрэх түмүктэннэ.

Күрэхтэһиигэ 60-тан тахса эдэр мадьыны кытынна. «Роман Дмитриев кэриэһигэр түһүлгэни биһиги Арктика улуустарын ортотугар иккис сылын ыыттыбыт. Бу сырыыга түһүлгэ Монреальга Олимпийскай оонньууларга саха тустууктарын чаҕылхай кыайыыларын 50 сылыгар ананна. Уопсайа 18 ыйааһын категориятыгар бастыҥнары быһаарсарга 66 уол уонна кыыс муһунна», — диэн тэрийээччилэр кэпсээтилэр.

Түһүлгэ Арктика улуустарын оҕолорун ортотугар үтүө үгэскэ кубулуйан эрэр. Бу сырыыга эдэр мадьынылар бастыҥнары быһаарсыынан эрэ муҥурдамматылар — Саха сирин саҥардыы буолбут муҥутуур кыайыылааҕа Василий Чемпин уопутун кытта үллэһиннэ. Ааттаах-суоллаах күрэсчит ааспыт сылтан Эдьигээн улууһун – бэйэтин иккис кыра дойдутун – аатыттан киирсэр. Түһүлгэ кыайыылаахтара уонна призердара мэтээллэринэн, кырааматаларынан, улуус дьаһалтатын, ону таһынан Эдьигээн оскуолатын араас сыллардааҕы выпускниктарын бириистэринэн наҕараадаланнылар.

Күрэхтэһии сүрүн судьуйатынан уопуттаах Егор Ермолаев үлэлээтэ. Кини эмиэ бастыҥ күрэсчиттэргэ бэйэтин бириистэри туруорда. Кыргыттар уонна уолаттар ортолоругар муҥутуур кыайыылаахтар олохтоох урбаанньыттартан-спонсордартан оонньуур приставканы уонна пылесоһу туттулар.

Кыргыттар ортолоругар бэйэлэрин ыйааһыннарыгар кыайыылаахтарынан буоллулар: Тамара Шадрина (40 кг), Каролина Карамзина (50 кг), Ланелия Хайрулина (50+ кг), Анастасия Иванова (60 кг), Индира Атласова (60+ кг), Айталина Семёнова (50 кг), Милана Громова (60 кг), Дарина Жарникова (70 кг). Уолаттар ортолоругар кыһыл көмүс мэтээли ылаттаатылар: Аким Анрюшенко (40 кг), Тускул Сергеев (50+ кг), Мичил Саввин (50 кг), Павел Николаев (60 кг), Остап Анисимов (60+ кг), Юрий Слепцов (50 кг), Сергей Захаров (60 кг), Александр Петров (70 кг), Артур Портнягин (70+ кг). Муҥутуур бастыыр иһин киирсиигэ Милана Громова уонна Артур Портнягин кыайдылар.