Эдьигээҥҥэ түргэн интэриниэт үлэлээтэ

Ил Дархан Айсен Николаев Эдьигээҥҥэ оптика ситимин үлэҕэ киллэрии тэрээһинигэр кытынна. 

Санатар буоллахха, түргэн интэриниэтинэн Арктика улуустарын хааччыйыы тэтимнээхтик барар. Оптика утаҕын Бүлүү улууһун Хаҕыныттан  Эдьигээн сэлиэнньэтигэр диэри тартылар, ырааҕа 370 км тэҥнэһэр. Маннык үлэ түмүгэр, Бэстээх уонна Баахынай нэһилиэктэригэр түргэн интэриниэт холбоноро ситиһилиннэ. «Биһиги бүгүн историческай өттүнэн  улахан сабыытыйаҕа кытынныбыт. Ол курдук, Сахабыт сиригэр сибээс коммуникациятыгар боччумнаах уларыйыы киирдэ. Бу аҥаардас сибээс өҥөтүн эрэ киллэрии буолбатах, бу нэһилиэнньэ олоҕун тупсарыы буолар.  Бүгүн Эдьигээн улууһун үс нэһилиэгэр түргэн интэриниэт үлэлээтэ. Сыл бүтүөр диэри аны Кыстатыамҥа тиийиэҕэ», — диэн Айсен Николаев эттэ.

Ил Дархан сүрүн сыалынан-соругунан Арктика бары улуустарыгар түргэн интэриниэти тиэрдии буоларын туһунан эттэ. Кэлэр өттүгэр Өлүөхүмэ улууһугар тустаах үлэ ыытыллыаҕа. «Синергия Арктики» бырайыак федеральнай уонна эрэгийиэннээҕи бүддьүөттэртэн үбүлэнэр. Манна сүрүн толорооччунан өрөспүүбүлүкэтээҕи «АрктикТелеком» оператор буолар. 2026 сылга диэри бырайыак быһыытынан барыта 86 арктика уонна ыраах сытар нэһилиэктэргэ түргэн интэриниэт холбонуллуоҕа. Барыта 7 тыһ. уһуннаах оптика утаҕа тардыллыаҕа.

Санатар буоллахха, бырайыагы олоххо киллэрэр инниттэн РФ Сыыппараны сайыннарыыга уонна Саха сирэ бииргэ үлэлииргэ Сөбүлэһии 2022 сыллаахха түһэрсиллибитэ уонн РФ Федерацияҕа Сэбиэтин өйөбүлүн ылбыта. 2023 сыл ыам ыйыгар бырайыагы РФ Бэрэсидьиэнэ Владимир Путиҥҥа билиһиннэрбиттэрэ. Ити сыл балаҕан ыйыгар Владимир Путин Уһук Илин куораттарын сайыннарыыга аналлаах мунньахха  бырайыагы өйүүрүн биллэрбитэ.