Эдьигээҥҥэ уоруу арылынна

«Эдьигээн» ИДьМ отделын дьуһуурунай чааһыгар олохтоох дьахтар дьиэтиттэн тоҥ эт соҕотуопката бэлэмнэммитэ уоруллубутун туһунан иһитиннэрии киллэрдэ. Бу туһунан СӨ ИДьМ пресс-сулууспата иһитиннэрэр.

Хоромньу 3 тыһ. солк. буолла. Полицейскайдар суһал-көрдүүр дьаһалларынан 34 саастаах олохтоох эр киһини туттулар.

Уорбаланааччы түүн дьахтар дьиэтин аттынан ааһан иһэн, киирэр аан аһаҕас турарын көрөн, дьиэҕэ үөмэн киирбит. Дьиэлээх хаһаайка хоско утуйа сыттаҕына, уорбаланааччы куукунаҕа киирбит уонна тоҥ эт соҕотуопкатын, ол иһигэр таба сүрэҕин кыбынан тахсыбыт.

Уорбаланааччыга РФ Холуобунай Кодексатын 3 ч. 158-с ыст. холуобунай дьыала тэрилиннэ. Кини ханна да олорор сириттэн барбатыгар мэктиэ сурук ылылынна.