Эдьигээннэр оскуола тутулларын күүтэллэр

Олунньу 6 күнүн иккис аҥарыгар Эдьигээн улууһугар Бырабыытылыстыба отчуотун ыыта кэлбит исписэлиистэр Эдьигээн орто оскуолатын эбийиэктэрин кэрийдилэр.

Үөрэҕирии салаатыгар киирэр эбийиэктэр сорохторо ааспыт үйэ 60-80-с сылларга тутуллубуттар, онон кыһын оҕо үөрэнэригэр сөптөөх сылааһы туталлара уустуктардаах. Билигин Эдьигээҥҥэ 450 миэстэлээх саҥа оскуола тутуллуутугар анаан бырайыактыыр симиэтэ үлэтэ бэлэмнэниэхтээх. Оскуола дириэктэрэ Любовь Корякина интэриниэт мөлтөҕө оҕо сайдыытын олус атахтыыр диэн этэр.

“Цифровой тэҥэ суох буолуу олус охсуулаах буолла. Холобура, бүгүн үрдүкү кылаас оҕолоро АГАТУ олимпиадатыгар кытта сатаатылар, ол эрээри интэриниэт мөлтөҕүттэн сорудахтар кэмигэр ааспаккалар, болдьоммут кэмҥэ сорудахтары кыайан толорботулар”, — диир дириэктэр. Любовь Петровна маны кытта оскуола саҥа дьиэлэннэҕинэ хайдах быһыылаахтык үөрэнээччилэр үөрэниэхтэрин былааннаан кэпсээтэ. Былырыын Эдьигээн улууһун Кыстатыам нэһилиэгэр таас оскуола-саад үлэҕэ киирбитэ.