Эдьиий Дора сүбэлиир: «Дьиэмсэх уонна оҕомсох буолуохха»

Сэтинньи 15 күнүгэр Нам улууһун М.К. Аммосов аатынан култуура уонна духуобунай сайдыы дыбарыаһыгар айылҕаттан анатыылаах, үөһэттэн этитиилээх норуот эмчитэ Федора Иннокентьевна Кобякова — Эдьиий Дора улуус олохтоохторун кытары көрсүһүүтэ тэрилиннэ.

Нам улууһун дьаһалтатын пресс-сулууспатын иһитиннэриитинэн, Эдьиий Дора дьонугар-сэргэтигэр билиҥҥи уустук кэмҥэ сүбэтин-аматын уонна мэктиэ тылын тиэртэ. Кини хас биирдии саха киһитигэр дьиҥнээх бодо кэмэ, киһи киһиэхэ наадыйар кэмэ дьэ кэлбитин эттэ. «Уруккулуу олорон бүтүөххэ, барыга бары харыстабыллаахтык сыһыаннаһыахха, бэйэ бодотун тардыныахха» диэн бар дьонун ыҥырда.

«Убаастабыл, ытыктабыл баар буолуохтаах. Барыны барытын атын хараҕынан көрүөхтээхпит, киһи быһыытынан уларыйаргытыгар баҕарабын. Олоххо ыксаамаҥ, сирдээҕи олоҕунан олороргутугар ыҥырабын. «Үчүгэй» уонна «куһаҕан» тэҥҥэ арыаллаһа сылдьар — үчүгэй кыайыахтаах. Урукку олоххутуттан үчүгэйин эрэ хаалларыҥ. Хас биирдии киһи үчүгэйи эрэ ыраланыахтаах. Саҥалыы тэринэн олоруохпутун наада. Онтон-мантан куттанымаҥ, куһаҕаны биттэнимэҥ. Тэрилтэ иһигэр ил олох, дьиэ кэргэҥҥэ эйэ баар буолуохтаах. Дьиэ кэргэн олоҕо дьахтартан тутулуктаах. Кини сааһылаан салайыахтаах, дьиэтэ өрүү ыраас, сылаас, аһа-үөлэ бэлэм буоларын хааччыйыахтаах. Билиҥҥиттэн киһи кырдьар сааска хайдах тиийэрин былаанныахтаах, кыраһыабайдык уонна маанытык кырдьыахтаах. Дьиэмсэх уонна оҕомсох буолуохха. Билигин үлэ суох буолбатах. Үлэни тиэргэммититтэн саҕалыахха. Ол курдук, сүөһүнү-аһы, сыспай сиэллээҕи дэлэйдик иитиэххэ, аһылыкпытын көрүнүөххэ, аймаҕынан олоххо уопсай көрүүлэниэххэ, хаачыстыбалаах аһы-үөлү дэлэтиэххэ. Оҕолоргутун харыстааҥ, ыччаттаргытын көрүҥ. Оҕомсох, уруумсах, дойдумсах буолуҥ. Саха сирэ кэнники балысханнык сайдыаҕа», — диэн Эдьиий Дора сүбэлиир.

Ити күн дьон-сэргэ Эдьиий Дора ыллыктаах санааларын, сирдьит этиилэрин истэн дууһаларыгар иҥэрилиннилэр, тус кыһалҕаларыгар сүбэлэри ыллылар. Эдьиий Дора көрсүһүүгэ элбэх киһи кэлэн кини алгыс, арчылыыр тылларын болҕойон истибитин, онуоха эдэр дьон көхтөөх кыттыыны ылбыттарыттан үөрэрин биллэрдэ.