Эдуард Филиппов Арассыыйа бэрэсидьиэниттэн «Хорсунун иһин» мэтээли тутта

СӨ Бырабыыталыстыбатын бэрэссэдээтэлин бастакы солбуйааччы Дмитрий Садовников байыаннай дьайыы зонатыттан эргиллэн кэлбит Эдуард Филипповтыын көрүстэ. Кини бу туһунан телеграм-ханаалыгар суруйда:

«Бүгүн Эдуард Егорович Арассыыйа бэрэсидьиэниттэн «Хорсунун иһин» мэтээли тутта. Бу үрдүк наҕараада кини хорсунун уонна бэриниилээх буолуутун билинии буолар.
Эдуард Егорович — ураты тулуурдаах киһи, дьиҥнээх патриот. Сунтаар нэһилиэгин баһылыгынан үлэлии сылдьан, төрөөбүт дойдутун социальнай-экэнэмиичэскэй сайдыытыгар сүҥкэн кылаатын киллэрбитэ. Ордук ОДьКХ уонна тутуу салааларыгар элбэҕи оҥорбута.

Билигин Эдуард Егорович байыаннай дьайыы кыттыылаахтарын кытта «Саха сирэ — дьоруойдар дойдулара» бырагырааманан бэлэмнэниини ааһа сылдьар. Кини улахан инникилээҕэр бигэ эрэллээхпин!

Эдуард Филиппов курдук дьон — биһиги киэн туттуубут, өйөбүлбүт. Өрөспүүбүлүкэбитигэр маннык эппиэтинэстээх салайааччылар баалларыттан ис сүрэхпиттэн үөрэбин!».

Сиһилии сигэнэн билсиҥ.