Эдуард Максимов – Выбор Быкалыров аатынан хапсаҕай турнирын муҥутуур кыайыылааҕа

Тохсунньу 24-25 күннэригэр Бүлүү улууһун Тыымпы сэлиэнньэтигэр Саха сирин алта төгүллээх, норуоттар спартакиадаларын икки төгүллээх чөмпүйүөнүн Выбор  Быкалыров кэриэһигэр хапсаҕайга «А» категориялаах өрөспүүбүлүкэтээҕи турнир үрдүк таһымнаахтык ыытылынна. Бу туһунан Бүлүү улууһун дьаһалтатын пресс-сулууспата иһитиннэрэр.

Түһүлгэ муҥутуур кыайыылааҕынан Нам улууһун бөҕөһө Эдуард Максимов буолан, сүрүн бирииһи – 100 тыһыынча солкуобайы ылла. Икки күннээх түһүлгэҕэ өрөспүүбүлүкэ 109 бастыҥ бөҕөһө, ол иһигэр 10 успуорт маастара уонна 1 бочуоттаах маастар, күүстэрин холостулар. Бастакы күн эдэр кэскиллээх тустууктар күөн көрүстүлэр, оттон иккис күн «Бырааттыы Быкалыровтар» саалаҕа өрөспүүбүлүкэ биллэр-көстөр хапсаҕайдьыттара тахсан, тыҥааһыннаах киирсиилэри көрдөрдүлэр.

Көрөөччүлэр Увар Тимофеев, Александр Халыев, Айсен Килибеев, Андриан Ленскэй, Эдуард Максимов, Иван Семенов, Федор Харлампьев, Дугуйдан Винокуров курдук ааттаах бөҕөстөр хапсыһыыларын сэргээн көрдүлэр. Турнир кылаабынай судьуйатынан Андрей Яковлев үлэлээтэ, оттон күрэхтэһиини биллиилээх комментатор Александр Васильев-Көрдүгэн иилээн-саҕалаан ыытта.

Маныф таһынан турнирга 2008 сыллаахха төрөөбүт уонна онтон балыс саастаах уолаттар 45, 50, 55, 62, 70, 80 кг уонна 80 киилэттэн үөһэ ыйааһыннарга кииристилэр. Улахан дьон  57, 65, 75, 85, 95 кг уонна 95 киилэттэн үөһэ ыйааһыннарга күүстэрин уонна маастарыстыбаларын көрдөрдүлэр. Ону таһынан, бэтэрээн эр дьон 80 киилэҕэ диэри уонна 80 киилэттэн үөһэ ыйааһыннарга мэтээл иһин кииристилэр.