Ефим Степанов РФ норуодунай артыыһа буолла

Өрөспүүбүлүкэ күнүн көрсө Ил Дархан Айсен Николаев судаарыстыбаннай наҕараадалары туттарбыта. Бу күн П.А. Ойуунускай аатынан Саха академическай тыйаатырын артыыһа Ефим Степановка «РФ норуодунай артыыһа» үрдүк ааты иҥэрдилэр.

Ефим Николаевич Степанов — СӨ норуодунай артыыһа, ССРС Судаарыстыбаннай бириэмийэтин лауреата, Арассыыйа Судаарыстыбаннай бириэмийэтин лауреата, Саха АССР үтүөлээх артыыһа, П.А. Ойуунускай аатынан Судаарыстыбаннай бириэмийэ лауреата. Доҕордоһуу уордьанын кавалера.

Ефим Степанов 1950 сыл сэтинньи 10 күнүгэр Томпо оройуонун Кириэс-Халдьаайы бөһүөлэгэр төрөөбүтэ. 1974 сыллаахха Москваҕа Щепкин аатынан тыйаатыр училищетын үөрэнэн бүтэрбитэ. Кини «Хаарыан хампа күөх кытылым» испэктээкилгэ Кириск оруолун итэҕэтиилээхтик оонньоон, аар-саарга аатырбыта, үрдүк наҕараадалары ылбыта.

«Антология Саха театра» үс томнаах кинигэни бэлэмнээн таһаарбыта. Томпо улууһун Бочуоттаах олохтооҕо.