Егор Борисов: «Саха сирин олохтоохторо — дьиҥнээх патриоттар»

Сенатор Егор Борисов ааспыт быыбардар аһаҕастык уонна чиэһинэйдик бардылар диэн бэлиэтээтэ. Кини Саха сирин олохтоохторун дойдуларын уонна өрөспүүбүлүкэлэрин дьиҥнээх патриоттара диэн ааттаата.

— Саха сирин олохтоохторо түмсүүлээхтэрин, эппиэтинэстээхтэрин көрдөрбүттэриттэн олус үөрэбин. Куоластыыр күҥҥэ кинилэр бэйэлэрин бэрэстэбиитэллэрин эрэ талбатылар. Кинилэр бэйэлэрин инники олохторун, өрөспүүбүлүкэбит чугастааҕы сылларга ханнык суолунан барыаҕын, хайдах сайдыаҕын таллылар. Онон өйдөөн-төйдөөн талбыттарыттан олус үөрэбин. Улаханнык эппит-тыыммыт дьону батыспатылар, кириитикэлиэххэ эрэ диэн саҥарар дьоҥҥо куоластаабатылар, эрэгийиэн бигэ сайдар суолун таллылар.

Быыбарга кыайбыт, дьон итэҕэлин ылбыт хандьыдааттарга этиэм этэ: эһиги кыайыыгыт — саҕаланыыта эрэ. Туох баар билиигитин, сатабылгытын кыһалҕалары туоратарга, урут ситиһиллибити элбэтэргэ ыытыахтааххыт. Ханнык хайысхаҕа үлэлииргит оруола суох, нэһилиэнньэ олоҕун хаачыстыбата тупсарыгар, өрөспүүбүлүкэ сайдар усулуобуйатын тэрийэргэ күүскүтүн-уоххутун харыстаабакка үлэлиэххит диэн эрэнэбин, — диэн кини эттэ.