Егор Григорьев: «Владимир Путин миэдиктэри өйүүр саамай сөптөөх дьаһалы таһаарда»

Дойду Бэрэсидьиэнэ Владимир Путин кыра нэһилиэктэргэ, оройуон кииннэригэр, куораттарга үлэлиир миэдиктэр хамнастарыгар кулун тутар 1 күнүттэн эбии төлөбүрү олохтуур туһунан быһаарыытынан Бүлүү оройуонун киин балыыһатын кылаабынай бырааһа, Ил Түмэн дьокутаата Егор Григорьев санаатын үллэстэр:

— Биһиги Бэрэсидьиэммит Владимир Путин миэдиктэр хамнастарыгар эбии төлөбүрү олохтуурун туһунан этиитин үөрэ иһиттибит. Бу этиини РФ Бырабыыталыстыбатыгар олох кылгас болдьоххо быһаарыҥ диэн соруйбута биһиэхэ эрэли үөскэттэ. Биһиэхэ, тыа сиригэр, билигин кыһалҕабыт диэн,  миэдиктэрбит олус улахан ноҕоруускалаахтык үлэлииллэрэ буолар, онуоха итинник өйөбүлү оҥоруу олус үчүгэй. Тыа сирин мэдиссиинэтин үлэһиттэрин өйөөтөхпүтүнэ эрэ сатанар. Ону өйдөөн Владимир Путин саамай сөптөөх дьаһалы таһаарда дии саныыбын. Бу күннэргэ нормативтар кэллэхтэринэ, дьоммутугар иһитиннэриэхпит.

Бүгүн мэдиссиинэ сэбиэтигэр эмиэ бу туһунан кэпсэттибит. Түгэнинэн туһанан, бу буолаары турар дойду бэрэсидьиэнин быыбарыгар биһиги Владимир Путины өйүүрбүтүн биллэрэбит. Биир киһи курдук, биир сомоҕо буолан, биһиги, мэдиссиинэ үлэһиттэрэ куоласпытын биэрэргэ бэлэммит.