Егор Левин уулуссатыгар бэлиэ туруорулунна

Улуу Кыайыы үбүлүөйдээх сылын чэрчитинэн Кэбээйи нэһилиэгэр үлэ дьонун аатын үйэтитэр эмиэ биир өйдөбүнньүк бэлиэ турда. Бэлиэ сэбиэскэй былаас саҕана бэйэтин үлэтинэн Кэбээйи нэһилиэгэр, Кэбээйи оройуонугар биллибит орто звено салайааччыта, биригэдьиир Левин Егор Николаевичка ананна.

Егор Николаевич 1920 сыллаахха  Кэбээйи нэһилиэгэр төрөөбүтэ. 1938 сыллаахха Кэбээйи оскуолатын бэһис кылааһын бүтэрэн «Калинин» холкуоска араас сурук-бичик үлэтигэр үлэлээбитэ. 1942 сыллаахха Аҕа дойдуну көмүскүүр сэриигэ барбыта. «Аҕа дойду сэриитин II истиэпэннээх» уордьана, «Кавказ оборонатын иһин», «Берлини ылыы иһин», «1941-45 сс. Германияны кыайыы иһин» мэтээллэринэн наҕараадаламмыта.

1948 сыллаахха армияттан демобилизацияланан, төрөөбүт дойдутугар эргиллэн кэлэр. Кэлээт да, «Калинин» холкуоска биригэдьииринэн ананар уонна бу үлэҕэ орто дойдуттан барыар диэри ханна да тэйбэккэ 24 сыл устата үлэлээбит туруу үлэһит киһи этэ.

2002 сыллаахха Егор Николаевич аатын Кэбээйи нэһилиэгин уулуссатыгар Калинин түөлбэтигэр олохтоох дьокутааттар уураах таһааран иҥэрэн тураллар. Оттон бу бэлиэ Левин аатынан уулусса саҕаланыытыгар үүнэр ыччат бу Левин Е.Н. диэн туох киһи буоларын, кини аатын бу уулуссаҕа мээнэ анаабатахтара чуолкайын туоһулаан туруорулунна.

Бу бэлиэ олохтоох сирин булуутугар, аһыллыытыгар Егор Николаевич Левин оҕолоро, ыччаттара, нэһилиэк баһылыга И.И.Левин, бэтэрээннэр сэбиэттэрин бэрэссэдээтэлэ Е.А.Павлов, олохтоох дьокутааттар С.С.Кобяков, А.П.Кобякова, бырайыак ааптардара Т.Д.Максимова, А.П.Кобякова, орто оскуолаттан А.А.Гуляев салайааччылаах  9 “а” университетскай физико-математическай кылаас үөрэнээччилэрэ тыл этэн, хоһоон ааҕан астылар.

Бу бырайыак ааптардарын туһунан таарыйан аастахха, “Мичээр” оҕо тэрилтэтин иитээччилэрэ Максимова Т.Д. уонна Кобякова А.П. “Дьоһун дьону үйэтитэн” патриотическай кэскиллээх бырайыактарын үлэтин түмүгүнэн бу ытык бэлиэ төрөөн таҕыста.

Кэбээйи нэһилиэгин үгүс уулуссалара үлэ дьоруойдарын, дойдуларыгар бэриниилээх дьон ааттарын сүгэн тураллар. Бу дьоруой дьону сырдатар, кэпсиир бэлиэлэр өссө да туруоруллан иһиэхтэрэ.

Татьяна Максимова-Лазарева