Егор Винокуров: олохтоох бородууксуйаны элбэтэр, патриотическай иитиини күүһүрдэр наадатын ыйда

Уус Маайа оройуонун муниципальнай тэриллиитин бэрэстэбиитэллээх уорганын дьокутаата Егор Винокуров билиҥҥи кэмҥэ олохтоох бородууксуйаны элбэтэн, патриотическай иитиини күүһүрдэн, НАТО дойдулара араас дьайыыларын төрдүттэн суох оҥорор туһугар бары күүһү түмэр наадатын туһунан тус санаатын үллэһиннэ.

— Байыаннай эпэрээссийэнэн сибээстээн сөптөөх үлэ ыытылла турар дии саныыбын. Улуустан “Теплоэнергосервис” бэрэстэбиитэлэ байыаннай сулууспаҕа сылдьар тэрилтэлэрин үлэһиттэригэр көмө илдьэн кэлбитэ. Биһиги Ил Түмэҥҥэ дьокутааппыт Ларионов С.А. госпитальга эмтэнэ сылдьар биир дойдулаахпытыгар көмөтүн тиэрдибитэ. Биир дойдулаахпыт, Жатайдааҕы борокуот аалын өрөмүөннүүр собуот салайааччыта Азаров А.И. окуопаҕа сылдьар уолаттары көрсөн эмиэ тус көмө оҥорон кэлтэ. Олохтоохтор кыалларынан бары көмө оҥорор тэрээһиннэргэ кытталлар.
Биири чорботон этиэхпин баҕарабын. Бу дойдубутугар уустук кэмҥэ биһиэхэ куттал үөскүөн сөп бэйэбит уопсастыбатыгар диэн: 90-с сыллар саҕаланыахтарыттан ыла дойдуга сүрүн олохпут идеята, соруга диэххэ дуу, атыннык эттэххэ, идеологията суох кэриэтэ буолла. Итинэн даҕатан эттэххэ, патриотическай иитии ханна да быстардык аччаата. Бу түмүгэр дьон ортотугар араас туора, мөкү санаалар, быстах этиилэр баар буолуохтарын сөп. Маны барытын уталыппакка эрэ тохтотор наада. Сонно тута полицияҕа биллэрэн дьаһал ылларар гына. Билиҥҥи кэмҥэ дойдубутугар итинтэн ордук кутталлаах суох дии саныыбын. Ордук ханнык эрэ биир нация интэриэһин өрө көтөҕөрү, кинини эрэ дарбатары сыыһанан ааҕабын, ити хойут омугумсуйууга тиэрдэр кутталлаах, ол эбэтэр, фашизм төрдө буолан тахсыаҕын сөп.
Мин тус бэйэм санаам, билиҥҥи кэмҥэ олохтоох бородууксуйаны элбэтэн, патриотическай иитиини күүһүрдэн, НАТО дойдулара араас дьайыыларын төрдүттэн суох оҥорор туһугар бары күүһү түмэр наада дии саныыбын.