Егорович көҕүлээһининэн

Дьокуускайга Пушкин уулуссатыгар турар дьиэ Кыайыы күнүн көрсө киэркэйдэ, тубуста.

Бу дьиэ үлэҕэ киирбитэ балачча ыраата оҕуста. Таһыгар оччолортон үүнээйи арааһа олордуллар, дьиэ таһа киэркэйэр, тупсар. Маныаха хара бастакыттан бу дьиэ олохтоохторун болҕомтолорун А.Е.Алексеев тардыбыта. Кини уопсастыбаннай үлэҕэ олус көхтөөх.

Кини быһаччы тэрээһининэн уопсай дьиэ тэлгэһэтин таһыгар мас олордуллан, саас буолла да хатыҥнар тиллэн күөх саадка кубулуйаллар. Дьиэни-уоту көрүүгэ эппиэтинэстээх Павлова Ольга Николаевна сибэкки арааһын олордор. Бастакы подъеһы олус ыраастык тутан олорор. Кыайыы 80 сылын көрсө Анатолий Егорович олохтоохторго сэриигэ, тыылга сылдьыбыт, үлэлээбит эһээлэрбитин, эбээлэрбитин, ийэлэрбитин, аҕаларбытын чиэстээн тугу эмэ толкуйдуоҕуҥ диэн, бэйэтэ сүүрэн-көтөн хаартыскалары түмэн, харчы хомуйан, баннер оҥоттордо. Ыам ыйын 7 күнүгэр ийэлэргэ оҥоһуллубут искибиэргэ баннеры туруордулар. Олохтоохтор төрөппүттэрин үйэтиппит Анатолий Егоровичка махтаналлар.

Марта Николаева,

Дьокуускай

Хаартыскалар ааптар тиксэриилэрэ