“Эһэ оҕото диэн көрдүбүт, онон бакаа тыытыспаппыт”, — диир Тэҥкэ баһылыга

Бэҕэһээ Сунтаар улууһун Тэҥкэ нэһилиэгин аттыгар тыатааҕыны суолга ситэн ылбыттар.

Биһиги Тэҥкэ нэһилиэгин баһылыгар Николай Лидочеҥҥа эрийэн тахсан, балаһыанньа хайдаҕын-тугун ыйыталастыбыт.

—Ити Бордоҥтон биһиги нэһилиэкпитигэр кэлэр суолга билбэт дьоммут ситэн ылан видеоҕа устубуттар. Биһиэхэ өрүһүнэн устар, сынньанар турбааза баар, онно сынньана сылдьар эбэтэр ааһан иһэр дьон көрсүбүт буолуохтарын сөп. Эһэ оҕото диэн көрдүбүт, онон бакаа бултаһа сатаабаппыт. Чугас ийэтэ эҥин баар буолуон сөп. Онон нэһилиэк дьонугар ойуурга тахсымаҥ, оҕолоргутун мээнэ ыытымаҥ диэн этэбит.

Тэҥкэ нэһилиэгэ Сунтаар сэлиэнньэтиттэн 80-ча км ыраах сытар. Баһылык этэринэн, манна булчут дьон олороллор, ыттара да кыылга бара үөрүйэхтэр.

—Дьоҥҥо чугаһыыр түбэлтэтигэр лицензиябыт баар, -диир Николай Владимирович.