Эһэни бултаатылар

Бүгүн социальнай ситимнэринэн Үөһээ Бүлүү улууһугар үс эр киһи кырдьаҕаһы бултаабыт хаартыскалара киэҥник тарҕанна. Тугун-ханныгын билээри булчуттартан биирдэстэрин кытта төлөпүөнүнэн кэпсэтэ сырыттым.

— Былырыын уонча улахан сылгыны, уонтан тахса кулуну, убаһаны сиэтэ диэбиттэрэ. Быйыл эмиэ биир биэни, биир кулуну сиэбит. Онон олохтоох дьаһалта кутталлаах диэн бултуурга сорудахтаабыта. Бэҕэһээ Үөһээ Бүлүүттэн биир көстөөх Чуут эбэттэн үс буолан бултаатыбыт. Онно сылдьыбыппыт нэдиэлэ буолла, бултуурга көҥүллээхпит, сылгыны сиир буоллаҕына бултаһыҥ диэн дьаһал биэрбиттэрэ. Биһиги диэки эһэ син баар, онно-манна сылгыны тарта дииллэрэ иһиллэр. Сарсын салгыы барыахпыт, — диэн Үөдүгэй нэһилиэгин олохтооҕо, бултаабыта биэс уонча сыл буолан эрэр Анатолий Алексеев кылгастык кэпсиир.

Дьыл баччатыгар эһэ арҕахтан тахсан аччык буолан саамай мэнээктиир, сүөһүгэ, киһиэхэ кутталлаах кэмэ. Онон былырыыҥҥы курдук тыа хаһаайыстыбатыгар улахан хоромньуну таһаара илигинэ бултаһар ордук. Санатан эттэххэ, аҕыйах сыллааҕыта Өлүөхүмэ улууһун 1-Нөөрүүктээйи нэһилиэгэр торҕон эһэ киирэн хас да сүөһүгэ саба түспүтүн, кутталы үөскэппитин туһунан суруйан турабыт.