Хаартыска: "РусГазБурение"
Сэтинньи 10 күнүгэр Ленскэй оройуонугар Чайаҥдаҕа баахтабай бөһүөлэккэ үлэлии сылдьар «РусГазБурение» хампаанньа үлэһиттэригэр торҕоннообут эһэ саба түспүтэ.
Быһылаан баахтабай бөһүөлэккэ буолбут. Маастар уонна мэхээнньик табахтыы тураннар, ыттар тугу эрэ сырса сылдьалларын бэлиэтии көрбүттэр. Эмискэ богуон кэнниттэн эһэ баар буола түһээт, мэхээнньиккэ саба түспүт.
Атын үлэһиттэр уолуйан, куотан хаалбатахтар, эһэни үргүтээри «Фальшфеер» диэн анал куттуур тэриллэри, огнетушителлэри туһаммыттар да, тыатааҕы онно улаханнык кыһамматах. Ол да буоллар, мэхээнньигин бырахпыт уонна иккис киһиэхэ саба түспүт.
Киһини быыһаабыттар эрээри, баччаларга арҕахха киирэ илик, торҕоннообут ырыган адьырҕа баахтабай бөһүөлэктэн барбатах, кыйа хаама сылдьыбыт. Ол иһин идэтийбит булчуту анаан ыҥырбыттар. Булчут суһаллык кэлэн, кыылы өлөрбүт.
Эмсэҕэлээбит үлэһиттэрин суһаллык Витимҥэ илдьибиттэр. Онтон анал сөмөлүөтүнэн Москваҕа көтүппүттэр. Биир киһилэрэ хаана баран, ыарахан туруктаах эбит.
Сэтинньи 21 күнүгэр «РусГазБурение» хампаанньа үлэһиттэрэ Иван Булашенко уонна Эльдар Гареев Склифософскай аатынан институкка этэҥҥэ эмтэнэн, балыыһаттан таҕыстылар.
Баахтабай үлэһиттэр салгыы дьиэлэригэр баран, доруобуйаларын чөлүгэр түһэриэхтэрэ, эмтэниэхтэрэ. Эһэ куйахаларын хайа тардыбыт уонна көмүскэнэ сырыттахтарына, илиилэрин бааһырдыбыт эбит. Дьолго, ханнык да уорганнара эчэйбэтэх. Онон быраастар кинилэри урукку чөллөрүгэр түһүөхтэрэ диэн эрэллээхтэр.
— Биһиги үлэһиттэрбит доруобуйаларын чөлгө түһэрэр кэмнэригэр туох баар өйөбүлү, көмөнү оҥоруохпут. Билигин маннык быһылааннар тахсыбаттарын ситиһэр былааны олоххо киллэрэргэ үлэ барар, — диэн «РусГазБурение» хампаанньа тарҕаппыт пресс-релиһигэр этиллэр.
«РусГазБурение» хампаанньа сүрүннээн сир баайын хостуурга скважиналары үүттүүр үлэлээх. Арассыыйаҕа хас да эрэгийиэҥҥэ үлэлииллэр.
Лев Павлов көҥүл тустууга юниордар истэригэр аан дойду чөмпүйэнээтигэр үрүҥ көмүс мэтээли ылары ситистэ. Кини…
Бүгүн, балаҕан ыйын 8 күнүгэр, Саха сирин соҕуруу, хотугулуу-илин, күнүс арҕаа улуустарыгар сорох сиринэн ардах,…
Бүгүн НТВ ханаал “Чудо” биэриитигэр Сунтаар улууһун Элгээйи орто оскуолатын үөрэнээччитэ, эдэр орнитолог, 11 саастаах…
Аҕыйах хонуктааҕыта Сунтаар улууһун Куокуну нэһилиэгэр Улахан Табаҕа киэҥ нэлэмэн, үрдүк үүнүүнү биэрэр бааһыната талах…
Оҕо барахсан хайа да кэмҥэ арахсыспат аргыһа – оонньуур буоллаҕа. Онон “Наука 0+” билим бэстибээлин…
Бу күннэргэ өрөспүүбүлүкэ улуустарыгар ититии сезона саҕаланан эрэр. Мэҥэ Хаҥалас улууһун пресс-сулууспата дьаһалта телеграм-ханаалыгар иһитиннэрбитинэн,…