Эһиил Аммаҕа ыытыллар Олоҥхо ыһыаҕар бэлэмнэнии саҕаланна

2024 сылга Амма улууһугар ыытыллар Олоҥхо ыһыаҕар бэлэмнэнии саҕаланна. Балаҕан ыйын 19 күнүгэр ыһыаҕы оҥорорго анаммыт кэмитиэт мунньаҕа буолла.

Тэрээһин кэмитиэтин салайааччыта СӨ бырабыыталыстыбатын бэрэссэдээтэлин солбуйааччы Сергей Местников этэринэн, Аммаҕа ыһыахха бэлэмнэнии чэрчитинэн 21 саҥа эбийиэги тутуу былааннаммыт. Сиэр-туом ыытыллар сирэ, түһүлгэлэр, күрэхтэһэр эбийиэктэр, Аал Луук Мас тутуллара барылга киирбит.

Тэрээһин арыллыытын уонна сабыллыытын режиссерунан Саха судаарыстыбаннай циркэтин салайааччыта Сергей Расторгуев анаммыт. Олоҥхо ыһыаҕын сүрүн ыытыллар сиринэн Амматааҕы сынньалаҥ уонна култуура паарката буолуоҕа.