Эһиил БКЭ уонна ОГЭ хаһан буолуохтарай?

2026 сылга Биир кэлим судаарыстыбаннай эксээмэн (БКЭ) сүрүн түһүмэҕэ бэс ыйын 1 күнүттэн, оттон Сүрүн судаарыстыбаннай эксээмэн (ОГЭ) — бэс ыйын 2 күнүттэн саҕаланыа.

Эксээмэнээр араспысаанньаларын Үөрэх уонна билим эйгэтигэр кэтээн көрөр федеральнай сулууспата  таһаарда. Ол курдук, БКЭ болдьоҕун иннинээҕи түһүмэҕэ кулун тутар 20 күнүттэн муус устар 20 күнүгэр диэри, сүрүн түһүмэҕэ — бэс ыйын 1 күнүттэн от ыйын 9 күнүгэр диэри, эбии түһүмэҕэ — балаҕан ыйын 4 күнүттэн 25 күнүгэр диэри ыытыллыаҕа.

Сүрүн түһүмэх саҕаланар болдьоҕо үөрэх дьыла ыам ыйын 26 күнүгэр түмүктэнэрин учуоттаан быһыллыбыт. Биридимиэттэринэн ыллахха:

• Бэс ыйын 1 күнэ — оскуоланы бүтэрээччилэр историяны, литератураны уонна химияны туттарыахтара;
• Бэс ыйын 4 күнэ — нуучча тылын;
• Бэс ыйын 8 күнэ — базовай уонна профильнай математиканы;
• Бэс ыйын 11 күнэ — обществознаниены уонна физиканы;
• Бэс ыйын 15 күнэ — биологияны, географияны уонна омук тылларын (суругунан чааһын);
• Бэс ыйын 18 уонна 19 күннэрэ — информатика уонна омук тылларын.

Бэс ыйын 22 күнүттэн 25 күнүгэр диэри — бары биридимиэттэри туттарарга аналлаах саппаас күннэр олохтонуохтара. От ыйын 8 уонна 9 күннэригэр оскуоланы бүтэрээччилэр биир биридимиэти хос туттарыахтарын сөп.

9-с кылааһы бүтэрээччилэр туттарар ОГЭ-лэрэ эмиэ үс түһүмэҕинэн ыытыллыаҕа: болдьоҕун иннинээҕи (муус устар 21 — ыам ыйын 18), сүрүн (бэс ыйын 2 — от ыйын 6) уонна эбии (балаҕан ыйын 3 — 25).

Бирикээстэр барылларын уопсастыбаннай дьүүллэһиитэ алтынньы 31 күнүн киллэрэн туран ыытыллыаҕа. Маныаха БКЭ-ҕэ төрөппүттэр баар буолуохтарын сөп.