Эһиил өрөспүүбүлүкэтээҕи «Аҕа күрэҕэ» Тааттаҕа ыытыллыаҕа

Бу туһунан үлэ уонна социальнай сайдыы миниистирэ Елена Волкова  XXV  үбүлүөйдээх өрөспүүбүлүкэтээҕи «Аҕа күрэҕэ-2025» аҕа уонна уол оҕо күрэҕин түмүктэрин таһаарар тэрээһиҥҥэ иһитиннэрдэ.

Миниистир бэйэтин этиитигэр күрэх кыттааччыларыгар, оройуон дьаһалталарыгар тэрээһиҥҥэ көхтөөхтүк кыттыбыттарыгар махталын биллэрдэ.

Быйыл XXV  үбүлүөйдээх өрөспүүбүлүкэтээҕи «Аҕа күрэҕэ-2025»   кыайыылаахтарынан Тааттаттан Герман уонна Феликс Жегусовтар буолбуттара. Кинилэр 350 тыһ. солк. Ил Дархан бириэмийэтинэн наҕараадаламмыттара.

Үгэс быһыытынан, кэлэр күрэхтэһии «Аҕа күрэҕин» кыайыылаахтара олорор оройуоннарыгар ыытыллар.  Онон, таатталар 26-с өрөспүүбүлүкэтээҕи «Аҕа күрэҕин» ыытарга бэлэмнээхтэрин  бигэргэттилэр.