Эһиил «Карина» уус-уран хартыына Казахстаҥҥа киэҥ экрааҥҥа тахсыа

«Карина» уус-уран хартыына 2025 сыл тохсунньу 23 күнүгэр Казахстаҥҥа киэҥ экрааҥҥа тахсыаҕа.

Бу туһунан киинэни уһулбут бөлөх социальнай ситимнэринэн иһитиннэрдэ.

Санаттахха уус-уран хартыына уопсайа 52,7 мөл. солк. суума харчыны хомуйбута. «Карина» киинэ дьиҥнээх олоххо буол­бут түгэни кэпсиир киинэ, онон туох эрэ дьикти, соһутар түмүгэ суох, саҕаланыытыттан бүтэһигэр диэри биллэр ис хоһоон­ноох. Ол да буоллар, олус сатабыллаахтык суруллубут сценарий, астык режиссура киинэ бүтүөр диэри көрөөччү болҕомтотун экрааҥҥа хам хатыыр. Буолбут түгэни хас даҕаны хайысхаттан көрдөрөллөр: көрдөөһүн тэрээһинэ, холуобунай силиэстийэ үлэтэ, кыыс дьонун аймалҕана уонна, биллэн турар, кыра­чаан Карина тыаҕа муна сылдьара. Монтаж буолбут түгэн араас күннэригэр көһө сылдьар эрээри, таҥыы бэрт сатабыллаахтык оҥоһуллубут, сэһэн тиһигин ыһыктыбаккын.

Киинэҥэ Карина 12 күн устата Саха сирин тайҕатыгар муна сылдьыбытын туһунан дьиҥнээх олоххо буолбут түгэни кэпсиир. Ол саҕана кини 4 саастааҕа. Кастиҥҥа 300-тэн тахса сайаапка киирбититтэн София Прибылых талыллан оонньуур. Кини эдэр ийэтин Мария Кычкина толорор.