Эһиилги Олоҥхо ыһыаҕар бэлэмнэнэллэр

2026 сыллаахха өрөспүүбүлүкэтээҕи Олоҥхо ыһыаҕа Кэбээйи улууһугар ыытыллыахтаах.

Онон улахана суох кэм хаалбытынан, билигин нэһилиэктэргэ сүбэ мунньахтар ыытыллаллар.

“Сииттэ нэһилиэгэр олохтоох дьаһалта баһылыга Семен Тимофеев, дьаһалта үлэһиттэрэ, ону кытта тэрилтэ, түөлбэ салайааччылара, олохтоох нэһилиэк дьокутааттара, түмсүү салайааччылара кыттыылаах сүбэ мунньах буолан ааста. Манна эһиилги  Олоҥхо ыһыаҕын уонна Кыайыы 80 сылыгар аналлаах тэрээһиннэри дьүүллэстибит, — диэн кэпсиир А.В. Аргунов аатынан Норуот айымньытын, култууратын  дьиэтин дириэктэрэ Марианна Сивцева. — Ол курдук хас биирдии нэһилиэк 300 олбоҕу, 100 чаппарааҕы тигэн бэлэмниирбит туһунан былырыын улуус дьаһалтатыттан сорудах ылбыппыт. Бу улахан үлэни быйылгы сылы көтүппэккэ саҕалыырбыт хайаан да наадалааҕын ыйдылар”.

Олохтоох дьаһалта быһаарыытынан, бу сылга «Алаһа» эбээлэр түмсүүлэригэр сахалыы соннору, ону кытта 4 кыыска, 4 уолга сахалыы таҥастары тиктэрэргэ диэн былааннаабыттар. Бу ииһи-күүһү тигэргэ барытын бэйэлэрин кыыстара Тина Хатылыкованы кытта дуогабардаһыахтаахтар. Кэлэр ый диэки Тина кэлэн миэркэлэри ылбытын кэннэ, күүстээх иис үлэтэ саҕаланыахтаах. Олбох уонна чаппараах тигиитин тэрилтэнэн, түөлбэнэн үллэстэн тигэргэ сүбэлэспиттэр. Оттон аҕа сүбэтэ уһанар уолаттары, эр дьону түмүөхтээх.

“Маны таһынан Сииттэ сиригэр Үйэтитии сыла биллэриллибитинэн киэҥ хабааннаах үлэ ыытыллыахтааҕын туһунан былааннары, сүбэлэри, этиилэри иһиттибит. Олоҥхо ыһыаҕар уонна Кыайыы 80 сылыгар аналлаах тэрээһиҥҥэ анал хамыыһыйалар тэрилиннилэр. Аны ый аайы сүбэ мунньах ыҥыран, туох хамсааһын барбытын, барыахтааҕын туһунан түмсэн кэпсэтиэҕиҥ диэн уураах ылынныбыт. Онон Сииттэ олохтоохторун бары тэрээһиннэргэ ыҥырабыт, көхтөөх кыттыыны ылыаххыт диэн эрэнэбит”, — диэн түмүктээтэ Марианна Семеновна.