Эһиилгиттэн биэнсийэ биир коэффициенын сыаната 156 солк. тэҥнэһиэ

2026 сылга  биэнсийэ биир коэффициенын сыаната 156,76 солкуобайга тиийиэҕэ, оттон страховой биэнсийэҕэ эбии бэриллэр төлөбүр кээмэйэ 9584,69 солкуобай буолуоҕа. Бу туһунан Социальнай пуонда 2026 сыллааҕы уонна 2027-2028 сыллардааҕы былааннаах кэмин бүддьүөтүгэр олоҕуран ТАСС иһитиннэрэр.

Бу иннинэ РФ Бэрэсидьиэнэ Владимир Путин Биэнсийэ уонна социальнай страховкалааһын пуондатын 2026–2028 сыллардааҕы бүддьүөтүн туһунан сокуоҥҥа илии баттаабыта. Докумуон быһыытынан, биэнсийэ коэффициенын сыаната уонна страховой биэнсийэҕэ эбии төлөбүр 7,6% индексацияланыахтара.

Биэнсийэ коэффициена –  үлэһит хас биирдии үлэлээбит сылыгар үлэ биэрээччи уурар усунуоһуттан тутулуктанан мунньуллар бааллар. Киһи төһө элбэх баалы мунньунар да, соччонон страховой биэнсийэтэ үрдүк буолар. Бу көрдөрүүгэ ону таһынан аармыйаҕа сулууспа, оҕо көрүүтүгэр уоппуска уонна инбэлиит киһини көрүү-харайыы эмиэ дьайаллар. Маны таһынан, биэнсийэлэрин ый саҕаланыытыгар ылар дьон ахсынньы ыйын бүтүүтүгэр тохсунньу ыйдааҕы биэнсийэлэрин 7,6% үрдэтиллэн эрдэ ылыахтара диэн урут иһитиннэриллибитэ. Бу үлэлиир да, үлэлээбэт да биэнсийэлээхтэргэ барыларыгар сыһыаннаах.