Эһиилгиттэн хамнас алын кээмэйэ 18,5% үрдүөҕэ

Премьер-миниистир Михаил Мишустин 2024 сылга үлэ төлөбүрүн алын кээмэйэ (МРОТ) 18,5% индексацияланыа диэн вице-премьердэри кытта мунньахха эттэ.

Бу үрдэтии 5 мөлүйүөн киһи дохуота эбиллэригэр оруоллаах буолуоҕа.

Бу иннинэ бэрэсидьиэн Владимир Путин оҕо балтараа сааһыгар диэри төлөнөр босуобуйаны биэрэргэ төрөппүттэр дохуоттара ааҕыллыбат буоллун диэн ПМЭФ кэмигэр этии киллэрбитэ. Михаил Мишустин бу этии олоххо киирэрин бигэргэттэ.

Онон эһиилгиттэн оҕо көрөн олорор ийэ үлэтигэр эрдэ таҕыстаҕына да, босуобуйа төлөнөр буолуоҕа. Ону тэҥэ, инбэлиит оҕону көрөн олорор төрөппүт үлэтигэр таҕыстаҕына да, босуобуйа төлөнүө.

Биир кэлим босуобуйа анаммыт кэмигэр төлөнө туруоҕа (төрөппүттэр дохуоттарыттан тутулуга суох) диэн Үлэ, социальнай сайдыы министиэристибэтэ иһитиннэрэр.