Эһиилгиттэн оскуоланы бүтэрээччилэргэ үрүҥ көмүс мэтээллэри туттарыыны сөргүтүөхтэрэ

Арассыыйаҕа оскуоланы бүтэрээччилэргэ үрүҥ көмүс мэтээллэри туттарыы 2014 сылтан тохтообута. Бу сылларга кырылас “биэһинэн” бүтэрбиттэргэ кыһыл көмүс мэтээли туттаран кэллилэр. Ол эрээри, үрүҥ көмүс мэтээл оҕолору үөрэххэ, хаачыстыбаҕа көҕүлүүргэ биир төрүөт эбит диэн санааттан, 2023-2024 үөрэх дьылыттан сөргүтэн эрэллэр.

Ол курдук, үрүҥ көмүс мэтээллэри – “Үөрэххэ оһуобай ситиһиитин иһин” II истиэпэннээх мэтээллэри, үөрэх былааныгар сөп түбэһэр бары биридимиэттэригэр “туйгун” сыаналаах уонна иккиттэн элбэҕэ суох “үчүгэй” сыаналаах, эксээмэннэригэр маннык бааллары ылбыттарга туттараллар:

— нуучча тылыгар биир кэлим эксээмэҥҥэ (ЕГЭ) 60 баалтан кырата суох;

— биир эмэ үөрэх биридимиэтигэр туттарар биир кэлим эксээмэнигэр (ЕГЭ) 60 баалтан кырата суох;

— Өскөтүн оскуоланы бүтэрээччи ГВЭ көрүҥүнэн туттарар түгэнигэр — булгуччулаах биридимиэттэргэ 5 баал;

— өскөтүн оскуоланы бүтэрээччи эксээмэн араас көрүҥүн (ЕГЭ уонна ГВЭ) талар түгэнигэр – ГВЭ көрүҥүнэн туттарар булгуччулаах биир эксээмэнигэр – 5 баалы, ону тэҥэ, ЕГЭ көрүҥүнэн туттарар биир биридимиэккэ 60-тан кырата суох баалы ылыахтаах.