«Эйэ туһугар норуоттар сомоҕолоһуулара» пуорумҥа ыччат түмүстэ

А.Е.Кулаковскай-Өксөкүлээх Өлөксөй аатынан норуоттар сомоҕолоһууларын дьиэтигэр «Эйэ туһугар норуоттар сомоҕолоһуулара» Ыччат пуорума буолла.

Тэрээһиҥҥэ ыччат лиидэрдэрэ, уопсастыбаннай түмсүү бэрэстэбиитэллэрэ, ХИФУ, АГАТУ, АГИКИ, уу тырааныспарын институтун, мэдиссиинэ, педагогическай кэллиэстэр устудьуоннара түмүстүлэр.

Пуорумҥа СӨ тас сибээскэ уонна норуоттар дьыалаларыгар миниистир Г.Кириллин норуоттар култуураларын харыстааһыҥҥа эдэр ыччат ураты оруолун тоһоҕолоон бэлиэтээтэ. «Кэлэр көлүөнэҕэ доҕордоһууну, түмсүүлээх буолууну эһиги тиэрдиэхтээххит», — диэн кини эттэ. Салгыы миниистири солбуйааччы Татьяна Пяткина «Духовно-нравственное воспитание. Традиционные ценности в современном мире» былаһаакканы салайда. Үөрэх бырагырааматыгар «Знание» уопсастыба эспиэрэ, Бурятияҕа «Твой Ход» Бүтүн Арассыыйатааҕы бырайыак эрэгийиэннээҕи координатора Владимир Романов, уо.д.а. кыттыыны ыллылар.

Дьыалабыай оонньууга ыччаттар көхтөөхтүк кытыннылар. Дьыалабыай оонньууну ХИФУ устудьуоннар көҕүлээһиннэрин киинин дириэктэрэ Ася Артемьева сүрүннээтэ. Хамаандалар модератордарынан  «Знание» уопсастыба лектордара Дмитрий Жирков, Степан Слепцов, Ирина Большедворская уонна Норуоттар доҕордоһууларын дьиэтин исписэлииһэ Ольга Гаврилова буоллулар. Пуорум сэһэргэһии, санаа үллэстиитин былаһааккатынан буолла. Эспиэрдэр лиэксийэлэрэ, санаа үллэстиитэ тэрээһин кыттыылаахтарын дириҥник толкуйдуурга, ырытан көрөргө кыаҕы биэрдэ.

А.Е.Кулаковскай-Өксөкүлээх Өлөксөй аатынан норуоттар доҕордоһууларын дьиэтин пресс-сулууспата

Айталина Аргунова хаартыскаларга түһэриитэ