«Эйиэхэ сибэкки биэрээри…» — саҥа киинэ

Балаҕан ыйын 11 күнүттэн «Сибэкки биэрээри» диэн саҥа киинэ бары киинэ тыйаатырдарыгар көстүөҕэ.

Бу иннинэ прессаҕа көрдөрүү кэмигэр кэлбит кэрэ аҥаардарга, чахчы, сибэкки бэлэхтээн, үөртүлэр. Дьэ, култуура эйгэтигэр саҥа сезон саҕаланна!
Бу саҥа киинэни ким уһулла? Режиссер — Василий Слепцов, иккис режиссер — Лена Баланова. Оттон сценарийын уопуттаах Алексей Амбросьев (аччыгыйа) суруйбут эбит. Оператор — Серафим Федоров.

Көрөөччүлэри кимнээх оонньообуттара интэриэһиргэтэр. Манна элбэх киинэлэргэ уһуллубут, биллэр артыыстар Павел Ченянов, Сергей Баланов, Алексей Михайлов, Жанна Ксенофонтова, Александр Борисов, Сандаара Федотова, Дьулус Софронов, Альберт Алексеев, уо.д.а. уһуллубуттара кэрэхсэтэр.

Бу эдэр режиссер уус-уран киинэҕэ бастакы холонуута буолар. Кини: «Чиэһинэйдик, туох баарынан санааҕытын этээриҥ», — диэн эттэ.
Киинэ Арассыыйа Суруйааччыларын сойууһун чилиэнэ, биллэр драматург Сиэн Өкөр айымньытынан уһуллубут. Манна эбэн эттэххэ, бу айымньынан 80-с сыллардааҕы ыччаттар тустарынан киинэ уһуллан турар. Тыйаатырга испэктээкил быһыытынан эмиэ турбута. Бу сырыыга аныгы олоххо, аныгы «ыччакка» сыһыаран устубуттар. Ол эрээри, көрөөччү кыраҕы хараҕынан бэлиэтээтэххэ, сорох дааталара, саастара сөп түбэспэттэр. Холобур, 1992 сыллаахха уончалаах уолаттар пионерга киирбиттэрэ саарбах. 20 сыл ааспыт диэбиттэр да, отуттаах буолбатах, чанчыктара бэлиэр кырыарбыт, истэрэ лэһэйбит, орто саастарыгар үктэнэн эрэр түөрт уончалаах эр дьон көстөллөр.
Сиэн Өкөр бэйэтэ 1988 сыллаахха Саха тыйаатырыгар туруорбутун туһунан кэпсээтэ. Генеральнай продюсер Алексей Михайлов кинини 65 сааһынан эҕэрдэлээн туран, саха быһаҕын бэлэхтээтэ.

Киинэҕэ уончалаах уолаттар уһуллубуттар. Уһулар бөлөх эдэр, эрчимнээх, хараҕа уоттаах.
Киинэҕэ этиллибитин курдук, «бу олоххо барыта эриэ-дэхси буолбат». Олох баран иһэр, сороҕор ыра санаалар туолбаттар. Онон бу элбэҕи толкуйдатар киинэ.