Эһигини абылыа Майа кэрэ тюльпана

Мэҥэ Хаҥалас Майа сэлиэнньэтигэр тюльпаннар үүнэллэрин истибикит дуо? Икки оҕолоох эдэр ыал Надежда, Вячеслав Санниковтар былырыыҥҥыттан бу кэрэ сибэккилэри ахсынньы аам-даам тымныыта сатыылаан турдаҕына үүннэрэн, сааскы кэрэ бырааһынньыкка дьону үөрдэр буоллулар.

Ыал аҕата Вячеслав олус элбэх идиэйэлээх киһи. Кыыстара кыра эрдэҕинэ дьиэҕэ олордон көрбүттэрэ, табыллыбатах. Онтон санааларын түһэрбэккэ, сибэкки үүннэрэр питомниктарга көрүүгэ-харайыыга үөрэммиттэр. Уонна дьэ, ити ыра санааларын олоххо былырыын киллэрбиттэр. Тюльпаннарын олордоллоругар анаан гараастарыгар сыһыары дьиэ туппуттар. Оборудованиеларын атыылаһарга социальнай хантараагынан 250 тыһ. солк. ылбыттар. Бэйэлэрин үптэринэн 10 тыһыынча луковицаны соҕурууттан атыылаһан, массыынанан аҕалтарбыттар.

— Былырыын уон суорду, ол эбэтэр уон өҥнөөҕү олордубуппут. Быйыл эмиэ. Сибэкки саҥа үүнэр кэмигэр уутун нэдиэлэҕэ биирдэ кутабыт, улааттаҕына күн өрүү-өрүү. Салгын хамсыы туруохтаах. Онон дьиэ иһин сиигин, температуратын датчиктарынан кэтиибит. Олунньу бүтүүтэ атыылаан саҕалаабыппыт. Кэрэ аҥаардар бырааһынньыктарынан сакаас киириитэ үчүгэй, — диэн санаатын үллэһиннэ ыал ийэтэ Надежда.

Ол курдук, Санниковтар үүннэрбит кэрэ тюльпаннарын ылан, чугас дьоннорун үөрдээри тэрилтэлэр, кууһунан атыылааччылар хамаҕатык атыылаһаллар. Биирдиилээн дьон букет ылан үөрэн-көтөн бараллар.

Санниковтар кэрэ сибэккилэрэ дьону үөрдэ, абылыы турдуннар! Майаҕа даҕаны тюльпан үүнэр, арай эрэ Сочи буоллаҕай.