«Өймөкөөн» айан суола чөлүгэр түһэрилиннэ

Абый уонна Өймөкөөн улуустарыгар ардахтан халаан уутугар алдьаммыт массыына суолларыгар чөлүгэр түһэрии үлэлэрэ салҕаналлар. Бу туһунан СӨ Тырааныспарга уонна суол хаһаайыстыбатын миниистирин бастакы солбуйааччыта Анатолий Потапов брифинг кэмигэр иһитиннэрдэ.

Атырдьах ыйын 5 күнүнээҕи туругунан тырааныспар инфраструктуратын 59 учаастага чөлүгэр түһэрилиннэ. Уопсайа айылҕа алдьархайын түмүгэр 82 эбийиэк алдьаммыта, ол иһигэр 70 массыына суолун учаастага уонна 12 күргэ.

«Бүгүҥҥү күҥҥэ «Өймөкөөн» эрэгийиэннээҕи суолталаах айан суол олохтоммут тэхиниичэскэй нуормаҕа тиэрдилиннэ. Муниципальнай суолга икки учаастак алдьаммыта: «Томтор – Өймөкөөн» уонна «Өймөкөөн – Сордоҥноох». Бу суолларга алдьаммыт 23 учаастактан 19-һа номнуо чөлүгэр түһэрилиннэ, ордубут түөрт учаастакка үлэ салҕанар», — диэн Анатолий Потапов иһитиннэрдэ. Ону таһынан бөһүөлэк иһинээҕи суолларга алдьаныылар бэлиэтэннилэр: 29 кыһалҕалаах учаастак булулунна. Муниципальнай оройуоннар бэрэстэбиитэллэрин кытта алдьаныы аахталара оҥоһулуннулар, матырыйааллар Тутууга сыана олохтонор эрэгийиэннээҕи киинигэр  эспэртииһэҕэ ыытылыннылар. Сөбүлэһии ылыллыбытын кэннэ муниципальнай тэриллиилэргэ лимииттэр тиэрдиллиэхтэрэ. «Абый улууһугар Кэбэргэнэ сэлиэнньэтигэр биир күргэ алдьаммыт. Эбийиэк эмиэ эсэпэртииһэҕэ ыытылынна, ол түмүгүнэн муниципальнай таһымҥа наадалаах лимииттэр тиэрдиллиэхтэрэ», — диэн миниистир бастакы солбуйааччыта бэлиэтээтэ. Бу туһунан СӨ Ил Дарханын уонна Бырабыыталыстыбатын пресс-сулууспата иһитиннэрэр.