Өймөкөөн Чысхааныттан Тымныы полюһун сэртипикээтин тутаары туристар тоҕуоруһаллар

Сыл саҥатыгар Өймөкөөн улууһун баһылыга Александр Оконешников отчуотун кэмигэр нэһилиэктэргэ туризм хайысхатыгар үлэлэһэ сылдьар дьону кытта көрсүбүтэ. Санааларын истибитэ, кэскиллээх былааннары, бырайыактары торумнаабыта.

Ол да иһин буолуо, туризм салаатыгар үлэлэһэ сылдьар уонна оннук былааннаах дьон ситэриилээх былаас отчуоттуур бөлөҕүнэн туох боппуруостары туруорсалларын сыта-олоро толкуйдаан, эрдэттэн бэлэмнээх көрсүбүттэрэ.  Кэрэхсэбиллээҕэ баар, быйылгыттан Өймөкөөн улууһун дьаһалтатыгар туризмы сайыннарыыга туһуламмыт анал салаа баар буолуоҕа. Салайааччынан сахалартан бастакынан Эверест хайа чыпчаалын дабайбыт, ааттаах-суоллаах альпинист, туристары кытта үлэлэһэр уопуттаах туроператор Евгений Кривошапкин ананаары сылдьар. Евгений Александрович ситэриилээх былаас отчуотун кэмигэр СӨ туризм уонна маркетинг агенствотын генеральнай дириэктэрин солбуйааччы Александра Никифорованы кытта туризм салаатыгар үлэлэһэр дьону туспа мунньан көрүһүннэрдэ.

Араас толкуйдаах, былааннаах дьон элбэҕэ үөрдэр. Ол курдук, Евгений Кривошапкин бэлиэтээбитинэн, Томтор олохтооҕо, нэһилиэк баһылыгынан үлэлии сылдьыбыт Никифор Протопопов дьиэтин гостиница оҥостор баҕалаах. Кини кемпинг тутуутугар федеральнай бырагыраамаҕа киирсэр былааннаах.

Үчүгэй нэһилиэгин удьуор табаһыта “Осикат” родовой общинаны салайар, таба турбаазатын тэринэ сылдьар  Алексей Соколов Күбүмэ аттыгар табаларынан туристары көрсөргө үлэлэһэ сылдьар. Кини туристары табанан хатааһылатарын туристар олус сөбүлүүллэр эбит. Евгений Кривошапкин:  «Төрүт олохтоохторо атынан хатааһылатыыга ылсаллара буоллар», — диэн этиилээх. Кырдьык, бу нэһилиэк “Халыма” федеральнай трассатын аттыгар турар буолан, олохтоохтор Магадаҥҥа ааһан иһэр туристары хайа баҕарар көрсөр кыахтаахтар. Онуоха кэпсэтиини Евгений Кривошакин эрдэттэн ыытара чахчы.

Ыраахтан кэлбит ыалдьыттары бэйэтин дьиэтигэр 20-тэн тахса сыл көрсөр, омук туристара таптаан ааттыыр “Аан дойду эбээтэ” – “Бабушка мира” Тамара Васильева санаатын үллэһиннэ. Кини дьиэтин күүлэтин ититэн, туристары көрсөргө кэҥэтэр былааннаах.  Уус-Ньараҕа Айталина Дягилева, Томторго Иван Заболоцкай толору хааччыллыылаах гостиницалара туристарга былдьаһыкка сылдьара бэлиэтэннэ. Сордоҥноох олохтооҕо Түмэн Эрэлик Кырыарба Филипп уола  араас турмаршруттары тэрийэн Өймөкөөнүн аатырда сылдьар. Кини Саха сиригэр биир уопуттаах туроператорга тиийэ үүннэ. Үчүгэй олохтооҕо Семен Баишев Сунтаар Хайатыгар эспэдииссийэлэри тэрийэр Саха сиригэр биир эмиэ биллэр туроператор.

СӨ туризм уонна маркетинг ааҕыныстыбатын генеральнай дириэктэрин солбуйааччы Александра Никифорова көрсүһүүгэ туризм хайысхатыгар туох бырагыраама үлэлии турарын билиһиннэрдэ уонна бу хайысхаларынан үлэлэһэргэ көмөлөһүөх буолла.

Түмүккэ биир интэриэһинэй түгэни кэпсиим. Бу, арааһа, түбэһиэх түгэн буолбатаҕа буолуо. Бырабыыталастыба отчуоттуур бөлөҕө аара айаннаан иһэн, Күбүмэҕэ Өймөкөөн нэһилиэгэр баран иһэр туристар бөлөхтөрүн көрүстэ.

Онно Индияттан иһэр туристар бааллар эбит. Отчуот кэмигэр Өймөкөөн Чысхаана өссө Бахрейнтан, Таилантан уонна Арассыыйа араас эрэгийиэннэриттэн сылдьар туристарга Тымныы полюһугар сылдьыы сэртипикээтин туттарар түбүгэр сылдьара.

Дьэ, онон мантан инньэ Өймөкөөн нэһилиэктэригэр улууска туризмы сайыннарыыга улахан хамсааһын тахсыаҕа диэн эрэнэбит.