Өймөкөөн оройуонугар ууга түспүт киһини көрдүү водолазтар бардылар

Бэҕэһээ, балаҕан ыйын 28 күнүгэр, Өймөкөөн оройуонун диспетчерскэй сулууспатыгар Куйдуһун өрүскэ эр киһи ууга суорума суолламмытын туһунан иһитиннэрии киирбит.

1955 сыллаах төрүөх эр киһи сылгы баазатыттан уунан барбыт уонна тийиэхтээх сиригэр кэлбэтэх.

Кинини болдьоспут сирдэригэр уола кэтэспит даҕаны, аҕата биллибэтэх. Ааһан иһэр балыксыттар өрүскэ эргийэн хаалбыт оҥочону көрбүттэрин туһунан эппиттэр. Уола олохтоох дьону кытта оҥочону көрбүт сирдэригэр тиийэн көрдөөн баран, булбатахтар.

Бүгүн, балаҕан ыйын 29 күнүгэр, Дьокуускайтан ууга түспүт киһини көрдүү Саха сирин Быыһыыр сулууспатын водолазтара бардылар. Бөлөҕү Дмитрий Асекритов салайар.