Өймөкөөн оройуонун киинигэр халаан содулун туораталлар

Билигин Өймөкөөн улууһугар Арассыыйа ЫБМ СӨ Киин управлениетын быыһааччыларын суһал бөлөҕө уонна СӨ Быыһыыр сулууспатын быыһааччылара үлэлииллэр.

Миэстэтиттэн улуус хаһыатын кэрэспэдьиэнэ Ольга Скрыбыкина суруйарынан, Уус Ньараҕа халаан содулун туоратар үлэ саҕаламмыт. Саха сирин Быыһыыр сулууспатын биэс киһилээх бөлөҕө улуус киинигэр эмиэ үлэлиир.

Бөлөх ыстаарсайа Дмитрий Корнилов иһитиннэрбитинэн, быыһааччылар сэрии кэмин оҕото, бэтэрээнэ Довлетов Розыгул ууттан сытыйбыт малын-салын куурдарга көмөлөстүлэр. Бэтэрээн “Нерскэй” түөлбэҕэ олорор эбит.

Кинилэр салгыы Уус Ньаратааҕы кыраайы үөрэтэр түмэлгэ көмөлөһүөхтэрэ. Бу курдук, көмө салҕанар.

Ольга Скрыбыкина

Хаартыска: улуус хаһыата