Өймөкөөн сааһа — талааннаах фотограф хараҕынан

Семен Сивцев-Өймөкөөн Сэмэнэ Өймөкөөн улууһун дьаһалтатын култуураҕа салаатыгар исписэлииһинэн үлэлиир. Хаартыскаҕа түһэриинэн дьарыгырбыта быйыл лоп курдук 10 сыл буолла. Үксүн айылҕа кэрэ көстүүлэрин, дьыл кэмин уратыларын сөбүлээн түһэрэр.

Худуоһунньук идэлээх буолан, ураты кэрэни булан көрөр. Күн тахсыытын-киириитин, сиик түһүүтүн, кыыллар-көтөрдөр хамсаныыларын таба көрөн, сонордоһон, сыралаһан, күлүм түгэни хаартыскаҕа хатыырын сатыыр. Туһугар туспа умсулҕаннаах да, сыралаах да идэ буоллаҕа. Кини учуутала – Арассыыйа Худуоһунньуктарын сойууһун чилиэнэ Александра Бочкарева-Иннокентьева-Сууралдьыма.

Төрөөбүт-үөскээбит сирэ Өймөкөөн — бэйэтэ да ураты кэрэ айылҕалаах, баай бултаах-алтаах дойду. Хаардаах төбөлөөх, хачыр таастаах хайалар, кылыгырас ыраас уулаах өрүстэр, нарын-намчы күөх ньургуһун тэлгэнэ үүнэр көнө-налыы хонуулара, кыһыннары тоҥмот, сир анныттан тахсар сылаас уулаах үрэхтэр – бу барыта Өймөкөөн.

Өймөкөөҥҥө саас кэлиитэ ураты алыптаах. Ол ону талааннаах худуоһунньук, фотограф Семен Сивцев-Өймөкөөн Сэмэнэ түһэрбит хаартыскаларыгар кэрэхсээҥ.