Өймөкөөн Сордоҥнооҕун урбаанньыта туризм сонун көрүҥнэрин билиһиннэрдэ

Ааспыт өрөбүллэргэ  Өймөкөөн улууһугар «Тымныы полюһугар Өймөкөөҥҥө айан»  кыһыҥҥы туризм бэстибээлэ буолан ааста.

Өймөкөөн улууһун умсугутуулаах кэрэ айылҕата, үрдүк хайалара, кыһыннары тоҥмот өйүмэлэрэ үгүс турист болҕомтотун тардар.  Ол да иһин кэнники сылларга сынньанааччы ахсаана элбээн иһэр, ону тэҥэ сонун хайысхалар эмиэ эбиллэллэр. Билигин Өймөкөөн улууһун нэһилиэктэрин барытын хабан, туризм эйгэтэ сайдан, сырыы элбээн инникитин Өймөкөөҥҥө туристическэй кластер тэрийэр сорук турар. Кэлиҥҥи сылларга Сордоҥноох нэһилиэгин урбаанньыта Түмэн Кырыарба төрөөбүт нэһилиэгэр тымныы кэмҥэ сынньанары сөбүлүүр дьоҥҥо анаан Индигир Эбэҕэ туристическай лааҕыр оҥордо. Манна “Булчут ыллыга” диэн кыһыҥҥы булду билиһиннэрэр, амсатар сонун көрүҥ олоххо киирдэ.

Хаартыскаҕа түһэр сир баар. Турист дьоҕус балаакка-дьиэҕэ ас буһарынан хонон, өрөөн ааһыан сөп. Урбаанньыт биир дойдулаахтара, сылгыһыт дьиэ кэргэн Михаил уонна Марта Винокуровтар «Быйаҥ» сылгы көрөр баазаларыгар туристары көрсөн, бастакы кэмҥэ улахан өйөбүлү оҥордулар.

Өрөбүл күн кыһыҥҥы туризм бэстибээлигэр кыттыыны ылбыт СӨ урбааҥҥа уонна туризмҥа миниистирин солбуйааччы Мария Карпова уонна СӨ туризм сайдыытын ааҕыныстыбатын  генеральнай дириэктэрэ Спиридон Сивцев, аатырбыт блогер Панда Саха Сордоҥноох урбаанньытын туристическай лааҕырыгар сылдьан, бэйэлэрэ тоҥ дьарҕааны кыһан амсайдылар, бурааҥҥа «хатааһылаатылар, Винокуровтарга сылдьан сылгы баазатын кытта билистилэр, нэһилиэк уопсастыбанньыктара «Арчы дьиэтигэр» күндүлээбит үөрэ миинин амсайдылар.

… Ити курдук, туризмы сайыннарыыга утумнаахтык үлэлэһэр Өймөкөөн улууһун урбаанньыттара өссө да үгүс сонун бырайыактары олоххо киллэрэр былааннаахтар.