Өймөкөөн Төрүтүгэр бу сарсыарда Мэҥэ Быраматын ото кэллэ

Бу күннэргэ СӨ тыа хаһаайыстыбатын министиэристибэтэ халаантан эмсэҕэлээбит Өймөкөөн улууһун нэһилиэктэригэр паромунан сырыы түмүктэниэр диэри көмө оту тиэйиитин саамай үгэнэ буола турар.

Бүгүн Төрүт нэһилиэгэр толору оту тиэммит икки КамАЗ массыына кэлэн сүөкэннэ.

Кэбээйиттэн төрүттээх ыраах айан суоппара Григорий Иванов бүгүн аҕалбыт отторун, суол-иис туһунан маннык сырдатта:

— Биһиги Мэҥэ Хаҥалас улууһун Бырама нэһилиэгин ходуһаларыгар сытар бэлэм 23  туонна кэриҥэ оту тиэнэн кэллибит. Нэһилиэк суола куһаҕан диэн сэрэппиттэрэ. Кырдьык, суол олус кыараҕас буолан, билбэт дьон сэрэхэдийэн, түүн айаннаан иһэн, аара хонон, сарсыарданан кэллибит. Мин Өймөкөөн улууһугар бу бастакы сылдьыым буолар. Ыраах айаҥҥа өрүү сылдьар буолан, айаҥҥа уопуттаахпын.  Хамнаспытын тута төлөөбүт буолан, аара буолунай массыына иһэр.

Төрүт нэһилиэгин дьаһалтатын тыа хаһаайыстыбатыгар исписэлииһэ Виталий Атласов бэлиэтээбитинэн, былыырыын суол алдьанан, 42 туонна кэлбэтэх оту эмиэ холбуу тиэйэн эрэллэр.

—  Бүгүн икки массыына 22 туонна 800 киилэ оту аҕалла. Быйыл  сүөһүлээх дьон сакааһынан 77 туонна от кэлиэхтээх. Биир урулуоҥҥа 300 киилэ от киирэр. Онон былырыыҥҥы оту кытта холбоон, 100-тэн тахса туонна оту өссө да уонча массыына аҕаларын кэтэһэбит. Кыһыҥҥы айан суола аһылыннаҕына, Саҥа дьыл саҕана эбии аһылык кэлиэҕэ. Онон дьоммут кыстыгы этэҥҥэ көрсөр кыахтаннылар, — диэн санаатын үллэһиннэ Виталий Атласов.

Төрүт нэһилиэгин олохтооҕо, ынах сүөһүнү иитэр улахан уопуттаах Октябрина Столярчик истиҥ махталын тиэртэ:

— Мин быйыл оттуур ходуһам ууга сытар. Мииринэй улууһуттан кыыһым оҕолорун кытта кэлэн оттуу сатаатылар да, кыстыыр оппутун кыайан хаһаамматыбыт. Онон оттообут икки туонна оппутунан сүөһүлэрбитин быйыл сыл таһаарыа суохпут диэн, эһэрдиии толкуйдана сырыттахпытына, тыа хаһаайыстыбатын миниистирэ Артем Александров бэйэтинэн нэһилиэкпитигэр тиийэн кэлэн, «отунан көмөлөһүөхпүт, сүөһүгүтүн олох эһимэҥ» диэн барбыта. Миниистир тылыгар турда, оппут кэллэ. Мин уочаратым хаһан тиийэн, отум кэлэрэ биллибэт. Тыа сирин дьонун быһыытынан, бэйэ-бэйэбитин өйөһө олоробут. Онон отум кэлиэр диэри биир дойдулааҕым Галина Кондакова отун аҥаарын миэхэ биэрбитигэр истиҥ махталбын тиэрдэбин. Урукку сылларга  сытыйбыт, түүнүгүрбүт от кэлэриттэн  өрүү хомойор дьон, үчүгэй хаачыстыбалаах алаас отун илэ көрөн, санаалыын көнньүөрдүбүт. Айылҕа иэдээнигэр түбэспит Өймөкөөн улууһун олохтоохторугар улуус салалтатыттан саҕалаан, өрөспүүбүлүкэбит бырабыыталыстыбатыгар олус уустук кэмҥэ сөптөөх быһаарыыны ылынан улахан көмөнү оҥорбуттарыгар нэһилиэгим олохтоохторун аатыттан барҕа махталбын тиэрдэбин!

… Ити курдук, бу күннэргэ Өймөкөөн улууһун олохтоохторугар тыа хаһаайыстыбатын министиэристибэтэ өрөспүүлүкэ улуустарыттан ходуһаҕа турар быйыл сайын оттоммут оту тиэйтэрэн, дьон-сэргэ махталын биллэрэр.