Өймөкөөн Төрүтүгэр элбэх оҕолоох ийэлэргэ анаммыт Аал Луук Маһы оҥордулар

Бу күннэргэ Өймөкөөн улууһун Төрүт нэһилиэгин дьахталларын сэбиэтэ Дьиэ кэргэн сылын элбэх оҕолоох ийэлэргэ Махтал бэлиэтин – Аал Луук Маһы оҥорон түмүктээтэ.

Тэрээһин туһунан улуус Мунньаҕын Сэбиэтин дьокутаата, дьахтар сэбиэтин салайааччы Уруйдаана Егорова маннык билиһиннэрдэ:

— 300-чэкэ нэһилиэнньэлээх Төрүт нэһилиэгэ былыргы былыргыттан элбэх оҕолоох ийэлэринэн сураҕырар. Кэрэхсэбиллээҕэ баар, кэлиҥҥи сылларга элбэх оҕолоох эдэр ийэлэр элбээтилэр. Ол иһин биһиги дьоруой ийэлэрбитин, элбэх оҕолоох ыаллар мааны хотуттарын Аал Луук Мас моһуоннаах истиэндэҕэ олорон ааспыт элбэх оҕо ийэлэрин, эбээлэрин, бүгүҥҥү күҥҥэ төрөөбүт Төрүттэрин нэһилиэнньэтин ахсаанын элбэтэ сылдьар – барыта 30-тан тахса биэстэн элбэх оҕолордоох ийэлэр хаартыскаларын, наҕараадаларын суруйан үйэтиттибит.  Истиэндэ оҥоһуутун үбүлээһинин олохтоох дьаһалта уйунна.

Дьиэ кэргэн сылын түмүктүүр дьоро киэһэҕэ Төрүт нэһилиэгин элбэх оҕолоох ийэлэрин Аал Луук Маска үйэтиппит, дьахтар сэбиэтин кэскиллээх бырайыагын олоххо киллэрсибит дьоммутугар – баһылыкпытыгар  Владимир Алексеевка, дьахтар сэбиэтин көхтөөх актыбыыһыгар Акулина Егороваҕа, Дьокуускай куоракка истиэндэбитин сүүрэн- көтөн оҥорторбут Вероника Егороваҕа, истиэнэни уотунан киэргэтэн оҥорбут Александр Атласовка барҕа махталбытын тиэрдэбит.

Нэһилиэкпит дьонун-сэргэтин үйэтитэргэ туһуламмыт бырайыакпыт үүнэр сылга бэрт элбэх. Онон өрүү маннык  түмсүүлээх буолуоҕуҥ диэн биир дойдулаахтарбар махтанан туран, кэлэр сылга бары үлэҕэ көхтөөхтүк ылсыаҕыҥ диэн ыҥырабын.