Өймөкөөн Төрүтүн ыччаттара Кыайыы Знамятын уратытык көрүстүлэр

Бу күннэргэ Өймөкөөн улууһун Төрүт нэһилиэгин ыччаттара Улуу Кыайыы 80 сылыгар анаммыт Кыайыы Знамятын көрсүүгэ бэрт кэрэхсэбиллээх сонун тэрээһини тэрийдилэр.

Суолталаах тэрээһин туһунан Г.А. Кривошапкин аатын Төрүт орто оскуолатын устуоруйа предметин учуутала, бары тэрээһиннэри көҕүлээн ыытар  Айталина Атласова бу курдук кэпсээтэ:

— Биһиги, Төрүт нэһилиэгин ыччаттара, саас аайы кулун тутарга “Пионер” хайатын дабайар  үтүө үгэстээхпит. Онно оскуола оҕолорун илдьэ сылдьабыт. Быйыл Улуу Кыайыы сылынан  сибээстээн, ыччаттар Алексей Кондаков, Мария Атласова, Надежда Босикова, Мария Слепцова, Александр Атласов, Айталина Атласова, Дмитрий Давыдов буолан мустан олорон, Кыайыы Знамятын көрсүү кэмигэр бэтэрээннэрбит, олохтоохтор, оҕолор баҕа санааларын түмэн,  «Өйдөбүнньүк капсула» оҥорорго быһаарыммыппыт. Бу идиэйэни Пантелеймон Тулааһынап аатынан Култуура дьиэтин дириэктэрэ Надежда Босикова киллэрбитэ. Кыайыы Знамятын көрсүү үөрүүлээх кэмигэр нэһилиэк бэтэрээннэриттэн, олохтоохтортон 20 сылынан — Улуу Кыайыы 100 сылын бэлиэтиир кэмҥэ төрүттэр баҕа санааларын хомуйбуппут. 

Бу баҕа санаа суруктарын 20 сыл буолан баран, Улуу Кыайыы 100 сылыгар хостуохпут. Төрүт хайатын чыпчаалын дабайан, капсулабытын Төрүт нэһилиэгин 70-с сыллардааҕы ыччаттара туруорбут Мэҥэ сэргэлэрин аттыгар хаар-ардах, кыыл-суөл тыыппат гына буор иһигэр  кистээн ууруохпут. Кыайыы Знамятын көрсүү саҕана араас төрүөтүнэн кэлбэтэх дьон (ким айанныы сылдьан, ким бокуойа суох) “биһиги эмиэ баҕа санаабытын суруйуохпут этэ” диэн биллэрбиттэрэ. Онон кулун тутарга диэри ким баҕалаах капсулаҕа суругун кэлэн уган иһиэҕэ. Саас ыччаттар баҕалаах дьону хайаҕа илдьэн, саастаах өттө аллараа хаалан, дьоммутугар итии чэйдээх, астаах остуол тэрийэн, айылҕаҕа тахсыы сынньалаҥын тэрийэр былааннаахпыт. 

Тымныы полюһа Өймөкөөн Төрүтүн ыччаттарын сонун толкуйдара Улуу Кыайыы 80 сыллаах үбүлүөйүгэр ити курдук араас сүүрээннээри тэрийэргэ атын улуустар нэһилиэктэригэр холобур буолуон сөп.