Өймөкөөн Томторугар суолу оҥорор биригээдэлэр кэлиэхтэрэ

Бу күннэргэ Өймөкөөн улууһун Томтор нэһилиэгэр уу түһэн, олохтоохтор бэйэлэрин күүстэринэн Куйдуһун сапыраапкатыгар барар суолу үлэҕэ киллэрдилэр.

«Суол оҥорооччулар кэлэн, быстах кэмҥэ өрөмүөннээбит суолбутун грейдэринэн тэҥнээн биэрдилэр. Үп-харчы көрүлүннэҕинэ, манна суолу чиҥник анаан өрөмүөннүөхтэрэ. Билигин биһигини кытта тырааныспар министиэристибэтиттэн Уйусхан Шелковников үлэлэһэ сылдьар. Кинини кытта Агаякантан Куйдуһуҥҥа диэри «Өймөкөөн» өрөспүүбүлүкэтээҕи суолу үөрэттибит. Уу сууйбут сирдэринэн трассаны үрдэтэр үлэ барыаҕа. Маны таһынан, Эбэ Хайатыттан Буор Үрэх муостатыгар диэри суолу үрдэтэр боппуруос эмиэ үөрэтиигэ турда. Муосталар кыамталара мөлтөҕө билиннэ. Биирдии буочука тирэх буолан турбут. Ону улахан уу имири сууйан кэбистэ. Онон алдьаммыт муосталарга 3-4 анал улахан кыамталаах турбалар эбиллииһилэр диэн быһаардыбыт. Бу этиллибит барыта аакталарынан бигэргэтиллэн, тустаах министиэристибэҕэ барбыта. Онон сотору кэминэн улуус кииниттэн Уус Ньараттан уонна киин куораттан суолу оҥорор биригээдэлэр кэлэн үлэлиэхтэрэ.
Бүгүҥҥү күҥҥэ сүрүн сорук — отчуттар суолларын төһө кыалларынан оҥорон биэрии. Хаалбыт кэми баттаһа, төһө да ходуһа бүтүннүү ууга сыттар, моой отчуттар уонна сылгыһыттар оттуу сатыахтара. Ол эрээри улахан уу кэлэн, быйыл тыа хаһаайыстыбатын министиэристибэтин көмөтө суох кыстыкка киирии уустугурда. Онон бу күннэргэ, кылаабынайа, суоллары, муосталары саҥардыы соруга турар», — диэн бэлиэтээтэ Томтор нэһилиэгин баһылыга Алексей Винокуров.