Өймөкөөн улууһа билигин даҕаны уустук балаһыанньалаах

СӨ Бырабыыталыстыбатын Бэрэссэдээтэлэ Кирилл Бычков Өймөкөөн, Муома уонна Абый улуустарыгар халаан содулунан суһал сүбэ мунньаҕы ыытта. Ардахтан халааннаабыт нэһилиэктэр балаһыанньаларын Бырабыыталыстыба болҕомто киинигэр тутар.

Уустук балаһыанньа Өймөкөөҥҥө үөскээн турар, ол эрээри, гидрологтар сылыктааһыннарынан, уу сыыйа намтыыр диэн Кирилл Бычков бэйэтин телеграмм-ханаалыгар иһитиннэрэр. Улууска суһал ыстаап үлэлиир, гуманитарнай көмө тиэрдиллибит, эмсэҕэлээбиттэр бары быстах кэмҥэ олорор пууннарга олохтоммуттар.

Ууттан эмсэҕэлээбит улуустарга чөлүгэр түһэрэр үлэлэр уу түстэ даҕаны  саҕаланыахтара. Сүрүн соруктарынан: дьиэ, суоллар, тыа хаһаайыстыбатыгар көмө уонна кыстыкка бэлэмнэнии буолуохтара диэн бырабыыталыстыба бэрэссэдээтэлэ суруйар. Бары тустаах министиэристибэлэргэ үлэҕэ көхтөөхтүк кытталларыгар соруйбут. Сүрүн сыал – нэһилиэнньэни төһө кыалларынан, күннээҕи олоххо төнүннэрии, олохторун-дьаһахтарын чөлүгэр түһэрии.

Оҕолорго ураты болҕомтону ууруллуоҕа – улуустар сайаапкаларынан өрөспүүбүлүкэ тас өттүгэр оҕо лааҕырдарыгар сынньалаҥы тэрийиэхтэрэ. Чугастааҕы кэмҥэ, ардах халаанын содулуттан тахсыбыт хоромньуну ааҕарга, өрөспүүбүлүкэтээҕи хамыыһыйа тэриллиэ.