Өймөкөөн улууһугар — чөлүгэр түһэрии үлэтэ

Индигиир өрүс алдьатыылаах халаанын кэнниттэн Өймөкөөн улууһун  нэһилиэктэригэр чөлүгэр түһэрии үлэтэ тэтимнээхтик бара турар.

Улууска билигин туох үлэ ыытылларын туһунан «Өймөкөөн улууһа» МТ баһылыгын бастакы солбуйааччы Алексей Федотов маннык сырдатта:

— Улуус баһылыга Александр Оконешников дьаһалынан алдьатыылаах халаан кэнниттэн  чөлүгэр түһэрэр үлэни сүрүннүүргэ анаан улуустааҕы суһал ыстаап тэриллибитэ. Ыстаап эппиэттээх чилиэннэрэ бу күннэргэ Өймөкөөн, Томтор, Сордоҥноох уонна Төрүт нэһилиэктэринэн сылдьан үлэлээн кэллилэр. Нэһилиэнньэни кытта көрсүһүүлэргэ күннээҕи түбүктэн саҕалаан, кэскиллээх боппуруостарга тиийэ ырыттыбыт. Олохтоохтору  интэриэһиргиир боппуруос үгүс —  эмсэҕэлээбит дьоҥҥо төлөбүртэн саҕалаан, ууга ылларбыт  дьиэлэри хапытаалынай  өрөмүөннээһиҥҥэ тиийэ. Суһал ыстаап чилиэннэрэ нэһилиэк олохтоохторун баҕа санааларын инники үлэҕэ учуоттуур сыалтан бэлиэтэнэн ыллылар. Өрөспүүбүлүкэтээҕи, муниципальнай уонна нэһилиэктэр икки ардыларынааҕы суолларга, муосталарга уонна сатыы дьон ааһар сирдэригэр  чөлүгэр түһэрии  үлэтэ тэтимнээхтик ыытылынна. Тырааныспар министиэристибэтин исписэлиистэрин кытта ыкса үлэлээтибит.  Өрөспүүбүлүкэ Тырааныспарга министиэристибэтин официальнай чахчытынан, улууска халаан 82 суол  учаастагын алдьатта. Бүгүҥҥү күҥҥэ 29 суол  учаастага алдьаммыт, онтон 21 учаастак — суол, 8 — муоста. Быстах кэмҥэ үлэлиир суолу өрөмүөннээн, сырыы-айан биллэ сыыдамсыйда. Күн бүгүн халаан уутугар ылларбыт нэһилиэктэргэ ас-үөл, олоххо наадалаах табаардар, ону тэҥэ чөлүгэр түһэрэр үлэҕэ туттуллар тутуу матырыйааллара тиэллэн эрэллэр.

Бу күннэргэ тыа хаһаайыстыбатын министиэристибэтин уонна өрөспүүбүлүкэ үлэҕэ уонна нэһилиэнньэ социальнай көмүскэлин министиэристибэтин исписэлиистэрин бөлөхтөрө оройуоннааҕы суһал ыстаабы кытта  көхтөөхтүк үлэлээбиттэрин  бэлиэтиир тоҕоостоох. Ол курдук, суһал ыстаап үлэтин бастакы күннэриттэн биһигини кытта тутаах министиэристибэлэртэн кэлбит исписэлиистэр хамыыһыйалар састааптарыгар  киирсэн үлэлээтилэр, араас тустаах аакталары толордулар, методическай рекомендациялары биэрдилэр. Биирдиилээн дьон кинилэртэн эмиэ сүбэ-ама ыллылар. Бу күннэргэ оройуоҥҥа доруобуйа харыстабылын министиэристибэтиттэн эмчиттэр  бөлөхтөрө кэлэн  үлэлии сылдьар.

Өрөспүүбүлүкэ муниципальнай оройуоннарыттан тутааччылар биригээдэлэрэ кэлэн, чөлүгэр түһэрии үлэтигэр ылыстылар. Улуустартан кэлбит тутуу биригээдэлэрэ Өймөкөөҥҥө, Биэрэк Үрдүгэр уонна Хара-Тумулга кэлэн үлэлээн эрэллэр. 

 

Билиҥҥи туругунан улууска Бүлүү, Сунтаар, Ньурба, Горнай, Мэҥэ Хаҥалас улуустарыттан 5 тутуу биригээдэтэ кэлэн үлэлии сылдьар. Бу күннэргэ хас да биригээдэ эбии айаннаан иһэр. Кинилэр сүрүн соруктара — кылгас кэм иһигэр эмсэҕэлээбит дьиэлэри чөлүгэр түһэрии. Биллэн турар, халаан туһаттан таһаарбыт олорор дьиэлэрин чөлүгэр түһэриигэ  элбэх тутуу матырыйаала наада. Ол курдук, ууга барбыт дьиэлэр муосталарын, акылааттарын уларытыыга саҥа мас, хаптаһын туттуллуоҕа. Онуоха эрдэттэн бэлэмнэнэн,  улуустааҕы Суһал ыстаап таһаҕаһы таһыы төлөбүрүн, наадалаах тутуу матырыйаалын, тиэйии ороскуотун барытын киин куорат маҕаһыыннарын сыанатынан ааҕан-суоттаан, улахан үлэни ыытта. Айан көлөлөрүн уматыгынан хааччыйыы, тутуу матырыйаалын толору тиэммит массыыналары паромҥа уочарата суох аһардыы — бу барыта суһал быһаарыыны эрэйэр боппуруостар. Онон  бэрт кылгас кэм иһигэр улуустааҕы суһал ыстаап чөлүгэр түһэрии үлэтин тэтимнээхтик ыытыыга анаан ылсан үлэлээтэ.

Тыа хаһаайыстыбатын боппуруостара улууска олус сытыытык тураллар. Ол курдук, үгүс  ходуһа уу анныгар сытар. Онон быйылгы кыстыгы этэҥҥэ аһарар инниттэн, араас хайыхалаах кэпсэтиини ыыта сылдьабыт.  Аны ититии тиһигин улахан уу эмиэ оннуттан хамсатан, бу күннэргэ  «Теплосервис» тэрилтэ исписэлиистэрэ чөлүгэр түһэрии үлэтин күүскэ ыыталлар. Ууга барбыт дьиэлэри куурдар инниттэн, быйыл үгэс буолбут сылааһы биэрии кыраапыгыттан эрдэ итиини холбуур сорук турар.  

… Бу күннэргэ  ыксаллаах балаһыанньаҕа түбэспит Өймөкөөн улууһугар Саха сирэ бүттүүнэ көмөҕө туруммута санаабытын кынаттыыр, инникигэ эрэли үөскэтэр.  Маныаха улахан тэрээһин үлэни ыытар Ил Дархан Айсен Николаевка, өрөспүүбүлүкэ бырабыыталыстыбатыгар, министиэристибэлэргэ уонна улуустар муниципальнай тэриллиилэрин баһылыктарыгар  уустук балаһыанньаҕа түбэспит Өймөкөөн улууһун олохтоохторун кэмигэр өйөөбүттэригэр истиҥ махталбытын тиэрдэбит, — диэн бэлиэтээтэ улуус баһылыгын бастакы  солбуйааччы Алексей Федотов.