Өймөкөөн улууһугар хайаттан түһүүгэ турист дьахтар эчэйбит

От ыйын 8 күнүгэр СӨ Быыһыыр сулууспатыгар, Өймөкөөн улууһугар Чен хайаттан түһүүгэ турист дьахтар атаҕын өлөрбүтүн туһунан иһитиннэрии киирбит.

53 саастаах дьахтар атаҕын тоһуппут буолуон сөп, онон бэйэтэ кыайан хаамар кыаҕа суох диэбиттэр. Инньэ гынан Аэромобильнай этэрээт  Үөһээ Дьааҥытааҕы уонна Орто Халыматааҕы көрдүүр-быыһыыр этэрээтэ бараары бэлэмнэммиттэр.

Иһитиннэрии Өймөкөөннөөҕү биир кэлим диспетчерскэй сулууспаҕа, Өймөкөөн улууһун Киин балыыһатын кылаабынай бырааһыгар тириэрдиллибит итиэнэ  Катастрофа мэдиссиинэтин киинигэр эвакуациялааһыҥҥа сайаапка киириитин  кэтээбиттэрин туһунан СӨ Быыһыыр сулууспата иһитиннэрдэ.

Ол гынан баран, от ыйын 9,10,11 күннэригэр күн-дьыл туруга мөлтөөн, көтөр  аал кыайан көппөтөх. От ыйын  11 күнүгэр Уус Ньараттан «Сокол» вездеходунан Өймөкөөн улууһунааҕы ЕДДС начаалынньыга салайааччылаах бөлөх айаннаабыт. От ыйын 12 күнүгэр сарсыарда  7 чааска төннүбүттэр. Ольчан өрүһү кыайан туораабатахтар.

Быыһыыр сулууспа быыһааччылара уонна Катастрофа мэдиссиинэтин суһал бөлөҕө от ыйын 9 күнүттэн эвакуациялыы барарга бэлэм олорбуттар. Ол эрээри Дьокуускайга, Өймөкөөҥҥө, Үөһээ Дьааҥыга күн-дьыл туруга мэһэйдээн, көтүү усулуобуйата суоҕа.

Бэҕэһээ, от ыйын 12 күнүгэр, в 20. 15 ч. Уус Ньараттан «Восток» ХЭУо бөртөлүөтүн ыытарга улуустааҕы дьаһалта дуогабардаспыт.  Халлаан туруга кылгас кэмҥэ арыый көнөн, бөртөлүөт тута айаннаабыт.  21.46 ч. бөртөлүөт турпоход бары кыттааччыларын  эвакуациялаан, суһал көмөҕө туттарбыт.