Өймөкөөн улууһугар халаан уутуттан уопсайа 129 олорор дьиэ эмсэҕэлээбит

СӨ Бырабыыталыстыбатын бэрэссэдээтэлин бастакы солбуйааччыта Дмитрий Садовников салайааччылаах оробуочай хамыыһыйа халаан содулун туоратыыга үлэтин салгыыр. Билигин хоромньуну ааҕыы күүскэ бара турар – миэстэтигэр хамыыһыйалар, министиэристибэлэр уонна биэдэмистибэлэр исписэлиистэрэ үлэлииллэр.

«Ону кытта тэҥҥэ эмсэҕэлээбит дьонтон сайабылыанньалары тутабыт: бу күн туругунан 1883 сайабылыанньа киирдэ, онтон 1350 – биир кэмнээх көмөҕө, 532 – сүтэриллибит баай-дуол иһин толуйууга уонна 1 – доруобуйаҕа оҥоһуллубут эчэйии иһин. 264 сайабылыанньанан сөбүлэһэр быһаарыы ылылынна, оттон 80-гар, хомойуох иһин, ыксаллаах быһыы-майгы зонатыгар олороллорун бигэргэтэр докумуоннара суоҕуттан эбэтэр докумуоннарын пакета толору хомуллубатаҕыттан аккаастанна. 144 сайабылыанньанан төлөбүр номнуо ыытылынна – уопсай суумата 2,84 мөл. солк.буолла.

Халаантан уопсайа 129 олорор дьиэ эчэйбит, онтон 5 дьиэ олорорго табыгаһа суох гына  алдьаммыт. Ону таһынан, инфраструктура суолталаах эбийиэктэрэ эмсэҕэлээтилэр: 10 учаастакка ититии ситимнэрэ, 1000 кэриҥэ уот лииньийэтин остуолбата, 72 суол учаастага, 53 тыа хаһаайыстыбатын эбийиэгэ, ону тэҥэ Өймөкөөҥҥө ФАП уонна Уус Ньараҕа кыраайы үөрэтэр түмэл.

Үөрүүлээх сонун – чөлүгэр түһэрии үлэлэрэ саҕаланнылар. Ону таһынан, көмөҕө кэлбит ыаллыы улуустартан биригээдэлэр кэлэн эрэллэр. Бастакынан Сунтаар улууһуттан быыһааччылар кэллилэр, кинилэр кэннилэриттэн Горнай уонна Ньурба улуустарын биригээдэлэрэ холбостулар. Нэдиэлэ бүтүөр диэри бары үлэлиэхтээх сирдэригэр тиийэн, үлэлэрин саҕалыахтара диэн күүтэбит», — диэн Дмитрий Садовников бэйэтин ТГ-ханаалыгар суруйар.

Үлэ күн аайы, өрөбүлэ суох барар. Бары күүс-уох дьоҥҥо көмөлөһүүгэ уонна инфраструктураны чөлүгэр түһэриигэ туһаайыллар.