Өймөкөөн улууһугар халаантан эмсэҕэлээбит ыаллар саҥа дьиэ күлүүһүн туттулар

Бу күннэргэ Өймөкөөн улууһун салалтата быйыл алдьатыылаах халаан кэнниттэн эмсэҕэлээбит нэһилиэктэринэн сылдьан, чөлүгэр түһэрии үлэтин чэрчитинэн тутуллубут саҥа эбийиэктэри үөрүүлээх быһыыга-майгыга үлэҕэ киллэрии сиэригэр-туомугар кытынна. 

Улуус баһылыга Александр Оконешников хамаандатын кытта быйыл сайын чөлүгэр түһэрии үлэтин кэмигэр кылгас кэм иһигэр социальнай суолталаах саҥа эбийиэктэри тутууга улахан үлэни ыыппыттара. Ахсынны 19 Өймөкөөн нэһилиэгэр түөртүү кыбартыыралаах икки дьиэ үөрүүлээх быһыыга-майгыга бэйэлэрин хаһаайыннарын көрсө ааннарын астылар.

Алдьатыылаах халаан кэнниттэн тутуллубут САРМ муостата эмиэ үлэҕэ киирдэ. Бу абыраллаах муоста ханнык баҕарар күн-дьыл туругар нэһилиэк олохтоохторугар сылы эргиччи сулууспалыырга бэлэм.

Онон ахсынньы ый ортотугар быйылгы сылы түмүктүүр үөрүүлээх түгэн Өймөкөөн улууһун усутуоруйатыгар саҥа кэрдиис кэм арыллыытын туоһутунан буолбут аҕыйах ый иһигэр тутуллан киирбит дьиэлэри уонна муостаны олоххо киллэрии  көмүс буукубунан сурулунна. Салгыы оройуон баһылыга Тымныы полюһунан аан дойдуга аатырар Өймөкөөн нэһилиэгин баһылыга Павел Васильев дуоһунаһыгар киириитин сиэригэр-туомугар кыттыыны ылла. Ахсынньы 21 күнүгэр оройуон салалтатын Сордоҥноох нэһилиэгин олохтоохторо үөрэ көрүстүлэр. Бу нэһилиэк айылҕа алдьархайыттан эмиэ улахан хоромньуну ылбыта. Аҕыйах ый иһигэр Орто Балаҕаҥҥа өссө биир түөрт кыбартыыралаах дьиэ тутуллан үлэҕэ киирдэ.

Чөлүгэр түһэрии үлэтэ бу нэһилиэккэ эмиэ күүстээхтик барбыта. Маныаха улууска көмүс хостуур тэрилтэлэр: «Западная» АУо, «Восток» ХЭУо, «Омега» ХЭУо үбүнэн өйөөн бу дьиэ тутуллан киирдэ. Олохтоохтор көмүсчүттэргэ махтанан бу дьиэҕэ анал бэлиэ сурук ыйаатылар.

Бу күн оройуон баһылыга Александр Оконешников уочараттаах өрөспүүбүлүкэтээҕи хапсаҕайга  күрэхтэһии түмүк, полуфинал, абсолютнай киирсиилэрин тэрээһинигэр  сырытта. Кини аҕатыгар Савелий Иванович Оконешников кэриэһигэр анаммыт тэрээһини дьиэ кэргэнин кытта анаан тэрийэн ыытара үгэскэ кубулуйда.  СӨ  физкультураҕа уонна успуорка туйгуна, Өймөкөөн улууһугар успуорт сайдыытыгар сыратын биэрбит Савелий Оконешниковы томтордор олуһун убаастыыллар, ытыктыыллар, кэриэстииллэр. Бу суолталаах спортивнай күрэхтэһии Савелий Иванович сүүрэн-көтөн үлэҕэ киллэрбит Томтордооҕу оҕо-ыччат спортивнай оскуолатыгар буолла.

Култуура киинигэр 2025 сыл түмүгүн таһаарар Саҥа дьыллааҕы Чөмпүйүөннэр уонна Ыччат бааллара ыытылынна. Манна быйылгы сыл бастыҥнарын чиэстээтилэр.

Ахсынньы 22 күнүгэр Үчүгэй нэһилиэгин олохтоохторо тутуллан бүтэн үлэҕэ киирэрин өр күүппүт 60 миэстэлээх оскуолаларын арыллыытыгар мустуохтара. Бу суолталаах тэрээһиҥҥэ куйаар ситиминэн Ил Дархан Айсен Николаев  кыттыыны ылыаҕа.

Быйыл Өймөкөөн улууһа 105 сыллаах үбүлүөйүн Дьокуускай куоракка бэлиэтииригэр ыксаллаах быһыы-майгы үлэтин түмүгүн таһаарар төгүрүк остуол ыытыллыбыта. Онно  СӨ Бырабыыталыстыбатын Бэрэссэдээтэлин бастакы солбуйааччы Дмитрий Садовников сайыҥҥы айылҕа алдьатыылаах халаан кэмигэр оройуон дьаһалтата бэрт эппиэтинэстээхтик сыһыаннаһан, өрөспүүбүлүкэ салалтатын уонна улуустарын баһылыктарын кытта биир ситимнээхтик үлэлээбитин иһин истиҥ махтал тылларын анаабыта. «Өймөкөөн оройуонун историята тыйыс усулуобуйалаах хоту дойдуга үгүс көлүөнэ дьон норуот хаһаайыстыбатын араас салаатыгар сыратын биэрбит үлэлэрин кытта ыкса сибээстээх. Кинилэр бэйэни харыстаммат үлэлэрэ, төрөөбүт дойдуларыгар бэриниилээх буолуулара аныгы ыччакка холобур буолар», — диэн бэлиэтээбитэ СӨ Бырабыыталыстыбатын Бэрэссэдээтэлин бастакы солбуйааччы Дмитрий Садовников түмүгү таһаарыы төгүрүк остуолугар. Айылҕа алдьатыылаах иэдээниттэн эмсэҕэлээбит улуус нэһилиэктэрэ оройуон салалтатын өйөбүлүнэн аҕыйах кэм иһигэр бары кыһалҕаны, уустугу туораан, саҥа эбийиэктэр ааннарын үөрүүлээх быһыыга-майгыга арыйан киириилэрэ — ол ону туоһулуур.