Өймөкөөн улууһугар ситэриилээх былаас отчуота саҕаланна

Бу сарсыарда улуус дьаһалтатыгар Өймөкөөн улууһугар ситэриилээх былаас отчуотун тэрээһин мунньаҕа буолла.

Сарсыарда оробуочай бөлөҕү кытта СӨ Бырабыыталыстыбатын бэрэссэдээтэлин солбуйааччы Сергей Местников мунньахтаата.
—— Өрөспүүбүлүкэ министиэристибэлэрин, биэдэмистибэлэрин сүрүн болҕомтото быйыл Өймөкөөн улууһугар ыытыллар Олоҥхо ыһыаҕар туһаайыллар. Онон быйылгы ситэриилээх былаас отчуотун улуус олохтоохторо кэтэһэн олороллор. Онон тэрээһин боппуруостара үгүс буолуоҕа. Мин Олоҥхо ыһыахтарын тэрийэр салайааччылартан биирдэстэрэ буоларым быһыытынан, Өймөкөөн улууһун олоҕун-дьаһаҕын анаан билсэ кэллим, — диэн бэлиэтээтэ Сергей Местников.

Күн иккис аҥаарыгар министиэристибэлэр бэрэстэбиитэллэрэ Уус-Ньара олохтоохторун кытта биирдиилээн көрсүһүүлэрэ тэриллиэҕэ. Уус-Ньараттан байыаннай дьайыыга сылдьар эдэр дьон төрөппүттэрин кытта көрсүһүү буолуоҕа.

Бүгүн ситэриилээх былаас отчуота бастакынан улуус кииниттэн Уус-Ньараттан саҕаланыаҕа. Сарсын оробуочай дэлэгээссийэ икки бөлөххө арахсан, Аартыкка уонна Төрүккэ үлэлиэхтэрэ. Бастакы бөлөҕү СӨ Бэрэссэдээтэлин солбуйааччы Сергей Местников, иккис бөлөҕү улуус куратора, Айылҕа харыстабылын уонна экология миниистирэ Евгений Перфильев салайаллар.