Өймөкөөн улууһугар сүүрбэттэн тахса тэлгэһэни уу ылла

Өймөкөөн улууһугар судургута суох балаһыанньа буолла. Күүстээх ардахтар түһэн, эмиэ уу таһыма тахсан, сүүрбэттэн тахса тэлгэһэ ууга барбыт. Тустаах ыйытыыга Ил Дархан хоруйдаата.

— Биир чаас анараа өттүгэр Өймөкөөҥҥө уу таһыма 499 см этэ, кутталлаах таһым 480 см саҕаланар. Сүүрбэттэн тахса тэлгэһэ ууга барда. Үс сиринэн федеральнай, эрэгийиэннээҕи, муниципальнай суоллар алдьаннылар. Алдьаныылара араас. Миэхэ дакылааттаабыттарынан, “Халыма” суолга сырыы реверсивнэй  эрэсииминэн чөлүгэр түһэрилиннэ.

Мин сорудахпынан, билигин гражданскай оборуона дьыалаларыгар уонна нэһилиэнньэҕэ куттал суох буолуутун хааччыйар миниистир бастакы солбуйааччыта Айаал Вензель салайааччылаах эбии быыһааччылары илдьэ Уус Ньараҕа сөмөлүөт көттө, — диэн Айсен Николаев иһитиннэрдэ.

Уу содулуттан чөлүгэр түһэрэр үлэлэр салгыы ыытыллаллар.