Өймөкөөн улууһугар уһун ардахтартан айан суолун эмиэ саптылар

Бу күннэргэ Өймөкөөн улууһугар уһун ардахтар тохтоло суох түһэн, Өймөкөөн улууһун  түөрт муниципальнай нэһилиэнньэлээх пууннарыгар эмиэ сэрэхтээх буолуу үрдүк эрэсиимэ олохтонно.

Бу туһунан нэһилиэнньэҕэ биллэрэн,  бэҕэһээ,  балаҕан ыйын 3 күнүгэр, улуус дьаһалтатын баһылыгын э.т. Саргылаана Можукова анал дьаһалга илии баттаата.

Тирэх Үрэх учаастагар айан суолун сууйан, “Өймөкөөн” өрөрспүүбүлүкэтээҕи айан суолугар турар Агаякаан муостатын сорох тирэҕэ сууллар кутталланан, Томтор эҥэр айан сырыыта эмиэ тохтоттулар. Улуус салайааччытын дьаһалыгар Өймөкөөннөөҕү РЭС салалтатыгар саахал тахсар түэнигэр ититии-уматык ресурсаларын эрдэттэн бэлэмнииллэригэр, улуустааҕы киин балыыһа салалтата ыксал буолар түбэлтэтигэр мэдиссиинэ суһал көмөтүн оҥороругар сорудахтанна.

Бу күннэргэ айаннаан испит такси массыыналары аара айаннаан иһэр КамАЗ-тар, Үчүгэй нэһилиэгин олохтоохторо түбэһэ кэлэн соһон таһаардылар. Быйыл Өймөкөөн улууһун олохтоохторо сайын кэлэн ааспытын да билбэтилэр.  Күн аайы кэриэтэ – ардах…