Өймөкөөн улууһун айанньыттара Күбүмэҕэ хаайтаран олороллор  

Бу күннэргэ хас да хонугу быһа түспүт уһун ардахтар “Өймөкөөн” өрөспүүбүлүкэтээҕи  айан суолун  Тирэх Үрэх  учаастагын суолун сууйан, айан-сырыы эмиэ харгыстанна.

Өймөкөөн улууһун баһылыгын э.т. Саргылаана Можукова Өймөкөөн улууһун сиригэр-уотугар ыксаллаах быһыыны-майгыны сэрэтэр уонна куттал суох буолуутун хааччыйар инниттэн “Үрдүк таһымнаах бэлэм” эрэсиимин олохтуур туһунан дьаһалы таһаарда. Бу докумуон улуустааҕы “Северная заря” хаһыат телеграм-ханаалыгар бэчээттэннэ. Үөскээбит кыһалҕаны быһаарарга, уустук балаһыанньаҕа түбэспит дьоҥҥо өйөбүл оҥорорго оройуон дьаһалтатын салалтата бары боппуруостары кэмигэр быһаарса олорор.

“Сарсын, алтынньы 16 күнүгэр, СӨ быыһыыр сулууспатын МИ-8 бөртөлүөтэ Күбүмэ учаастагыттан дьону Томтор нэһилиэгэр тиэрдэрэ былааннанар. Бүгүн күнүс оройуон дьаһалтатын суоппара Ефрем Любимов Күбүмэҕэ хаайтаран олорор 50 киһиэхэ суоттаммыт бастакы наадалаах ас-үөл бородууктатын (иһэр уу, килиэп, чэй, эт кэнсиэрбэтэ, саахар, арыы), гигиеническэй тэриллэри   уонна сылаас таҥаһы тиэрдиэҕэ. Хаайтара олорор айанньыттар ортолоругар аҕам саастаах дьон, кыра оҕолор бааллар. Үөскээбит балаһыанньаны улуус дьаһалтатын салалтата хонтуруолга тутар”, — диэн баһылык э.т. Саргылаана Можукова улуус пресс-сулууспатыгар иһитиннэрдэ.